ქუთაისის N7 საჯარო სკოლის პირველკლასელები მასშტაბურ გარემოსდაცვით პროგრამას -„ჩემი პირველი ნერგი“ დიდი სიხარულით შეუერთდნენ.
პატარებმა მათი პირველი ნერგი დარგეს.
ქუთაისის N7 საჯარო სკოლაში მოსწავლეთა გარემოსდაცვითი პასუხისმგებლობის ამაღლებაზე დაწყებითი კლასებიდანვე ზრუნავენ, ამიტომ ინიციატივა ახარებთ.
„მწვანე მომავალი პირველი ნერგიდან იწყება, დღეს ჩვენი პირველკლასელებისთვის განსაკუთრებული და სიმბოლური დღე შედგა. პატარებმა თავიანთი პირველი ნერგი დარგეს.
ეს დღე არ იყო მხოლოდ ხის დარგვა - ეს იყო პასუხისმგებლობის, ბუნებაზე ზრუნვისა და სიყვარულის პირველი გაკვეთილი. დღეიდან თითოეულ პატარას აქვს საკუთარი ნერგი, რომლის გაზრდასა და მოვლასაც თავად ადევნებს თვალს.
მადლობას ვუხდით ყველას, ვინც წვლილი შეიტანა ამ მნიშვნელოვანი ინიციატივის განხორციელებაში!
საქართველოს მთავრობის ინიციატივით, ქვეყნის მასშტაბით 41 000-ზე მეტი პირველკლასელი საკუთარ პირველ ნერგს რგავს.
პროგრამა საქართველოს პრემიერ-მინისტრის, ირაკლი კობახიძის მიერ ხელმოწერილი განკარგულების საფუძველზე ხორციელდება. მის განხორციელებაში ჩართული არიან საქართველოს გარემოს დაცვისა და სოფლის მეურნეობის სამინისტრო, გარემოსდაცვითი ინფორმაციისა და განათლების ცენტრი, საქართველოს განათლების, მეცნიერებისა და ახალგაზრდობის სამინისტრო, თბილისის მერია, სახელმწიფო რწმუნებულების ადმინისტრაციები და მუნიციპალიტეტები.
პროგრამის ფარგლებში ქვეყნის სხვადასხვა რეგიონში ბუნებრივი და კლიმატური პირობების გათვალისწინებით 12 სახეობის ნერგი დაირგვება.
იხილეთ ფოტოები:
