27 ოქტომბერს ცნობილი ქართველი განმანათლებლის, საქართველოში მეცნიერული პედაგოგიკის ფუძემდებლის იაკობ გოგებაშვილის დაბადების დღეა. ამ ღირსშესანიშნავ თარიღთან დაკავშირებით, ქუთაისის №4 საჯარო სკოლის II კლასში, პედაგოგ ნინო ბოჭორიშვილის ხელმძღვანელობით, ჩატარდა საინტერესო და შინაარსიანი აქტივობა სახელწოდებით - „ბავშვების მეგობარი და მასწავლებელი“.
მოსწავლეებმა გაიხსენეს დიდი ქართველი პედაგოგის, საბავშვო მწერლისა და საზოგადო მოღვაწის ცხოვრება და შემოქმედება. ისაუბრეს იაკობ გოგებაშვილის უდიდეს ღვაწლზე ქართული განათლებისა და მომავალი თაობების აღზრდის საქმეში.
აქტივობა გამდიდრდა საინტერესო საუბრებით, ბავშვების შთაბეჭდილებებითა და შემოქმედებითი დავალებებით. მოსწავლეებმა კიდევ ერთხელ გაიაზრეს, თუ რამდენად მნიშვნელოვანია მშობლიური ენის სიყვარული, ცოდნის მიღება და ერთმანეთის პატივისცემა. მათთვის იაკობ გოგებაშვილი წარმოჩნდა არა მხოლოდ დიდ მწერლად, არამედ ბავშვების მზრუნველ მეგობრად და დაუღალავ მასწავლებლად.
როგორც სკოლაში გვეუბნებიან, ღონისძიებამ ხელი შეუწყო მოსწავლეებში წიგნის კითხვისადმი ინტერესის, ეროვნული ღირებულებებისა და ქართული ენის სიყვარულის გაღრმავებას.
„ეს დღე პატარებისთვის ცოდნით, სითბოთი და კეთილი ემოციებით სავსე დაუვიწყარ მოგონებად იქცა“,- დასძენენ სკოლაში.
იხილეთ ფოტოები:
