როდიონოვკის საჯარო სკოლაში განათლების ხარისხზე ზრუნვა, მოსწავლეების განვითარება და მათი წარმატებული მომავლისთვის საფუძვლის შექმნა ყოველდღიური საქმიანობის მნიშვნელოვანი ნაწილია. სკოლა, სადაც დაახლოებით 50 მოსწავლე სწავლობს, გამოირჩევა პედაგოგების განსაკუთრებული მონდომებით, პროფესიონალიზმითა და ბავშვებისადმი სიყვარულით.

სკოლის დირექტორის, რუბენ საჰაკიანის განცხადებით, მომავალი წლიდან როდიონოვკაში ახალი სკოლის შენობის მშენებლობა იგეგმება. ეს სიახლე მნიშვნელოვანი და სასიხარულო მოვლენაა როგორც მოსწავლეებისა და მასწავლებლებისთვის, ისე მთელი ადგილობრივი საზოგადოებისთვის. ახალი, თანამედროვე სასწავლო გარემო მოსწავლეებს კიდევ უფრო მეტ შესაძლებლობას მისცემს, მიიღონ ხარისხიანი განათლება და საკუთარი შესაძლებლობები სრულად გამოავლინონ.

სკოლის ერთ-ერთი მნიშვნელოვანი უპირატესობა კვალიფიციური და სტატუსის მქონე პედაგოგებთა გუნდია. მასწავლებლები დიდი პასუხისმგებლობითა და სიყვარულით ემსახურებიან საკუთარ საქმეს. მათი პროფესიული გამოცდილება, ცოდნა და სწავლების ხარისხი მნიშვნელოვან გავლენას ახდენს მოსწავლეთა აკადემიურ მიღწევებსა და პიროვნულ განვითარებაზე.

„გვიხარია, რომ სკოლაში გვყავს პროფესიონალი, უფროსი და წამყვანი სტატუსის მქონე პედაგოგები, რომელთა კვალიფიკაცია და სწავლების ხარისხი მოსწავლეთა შედეგებზე აისახება“, - აღნიშნა სკოლის დირექტორმა.

მისივე თქმით, მასწავლებლის შრომა მხოლოდ ცოდნის გადაცემით არ შემოიფარგლება. იგი მოსწავლეებს ეხმარება კრიტიკული აზროვნების განვითარებაში, საკუთარი შესაძლებლობების აღმოჩენასა და მომავლისთვის საჭირო უნარების შეძენაში. სწორედ პედაგოგების თავდადება, მოსწავლეების მონდომება და სკოლის მხარდამჭერი გარემო ქმნის იმ საფუძველს, რომელზეც ახალგაზრდების წარმატება შენდება.

„როდიონოვკის საჯარო სკოლის მოსწავლეთა მიღწევები ამის ნათელი მაგალითია. ყოველწლიურად სკოლის კურსდამთავრებულები საქართველოს სხვადასხვა უნივერსიტეტში აგრძელებენ სწავლას, რაც სკოლისთვის განსაკუთრებული სიამაყის მიზეზია. მათი წარმატება ადასტურებს, რომ მიზანმიმართული შრომით, ხარისხიანი სწავლებითა და სწორი მხარდაჭერით პატარა სკოლაშიც შესაძლებელია მნიშვნელოვანი საგანმანათლებლო შედეგების მიღწევა.

ახალი სკოლის მშენებლობის მოლოდინი კი, კიდევ უფრო აძლიერებს რწმენას, რომ როდიონოვკის ზოგადსაგანმანათლებლო დაწესებულების მოსწავლეებს  წინ ახალი შესაძლებლობები და წარმატებები ელით. თანამედროვე ინფრასტრუქტურა, კვალიფიციური პედაგოგები და მოსწავლეებზე ორიენტირებული სასწავლო გარემო ხომ მნიშვნელოვანი წინაპირობაა მომავალი თაობის განვითარებისთვის“, - განაცხადა სკოლის ხელმძღვანელმა, რუბენ საჰაკიანმა.