მაღალმთიანი სვანეთის მკაცრ, თუმცა საოცრად დიდებულ ბუნებაში ჩაფლული სოფელი ბეჩოს საჯარო სკოლა ყოველდღიურად განსაკუთრებული ემოციითა და სიცოცხლით ივსება; აქ რეფორმებს ისე ხვდებიან არა როგორც ბიუროკრატიულ ვალდებულებას, არამედ როგორც სკოლის გაფერადებისა და გაცოცხლების ახალ შესაძლებლობას. ხელმძღვანელობისა და პედაგოგებისთვის თითოეული მოსწავლე უმთავრესი პრიორიტეტია, ხოლო ხარისხიანი განათლებისკენ მიმავალი გზა სიყვარულსა და ბავშვებისადმი უსაზღვრო კეთილგანწყობაზე გადის.

 

 

მისი თქმით, სასკოლო ფორმების შემოღებამ საოცარი ესთეტიკა და სადღესასწაულო ატმოსფერო შემოიტანა ყოველდღიურობაში: „უფორმა ერთიანობისა და სიამაყის განცდაა. იცით, როგორ უხდებათ ბავშვებს? ფორმებში გამოწყობილი მოსწავლეები საოცრად ლამაზები არიან და თავად საკლასო ოთახებიც კი სრულიად შეიცვალა, თითქოს ყველაფერი ერთიანად გალამაზდა. ეს სილამაზე ბავშვებს სკოლისადმი სულ სხვაგვარ პატივისცემას უნერგავს“, - აღნიშნავს ქალბატონი მერი და დასძენს, რომ ეს განსაკუთრებული პასუხისმგებლობა უფრო მკაფიოდ გამოჩნდა მოსწავლეთა შეფასების ახალი სამკომპონენტიანი მოდელის დანერგვისას.

 

ბეჩოს სკოლის ხელმძღვანელი სიამაყით აღნიშნავს, რომ ახალმა სისტემამ ბავშვებში სწავლისადმი მოტივაცია მეტად გააღვივა: „ჩვენს სკოლაში საოცარი რამ ხდება: ბავშვები, სხვადასხვა საპატიო მიზეზის გამო, ხანდახან სკოლაში რომც ვერ მოვიდნენ და გაკვეთილი გააცდინონ, სახლში მაინც უდიდესი მონდომებით ასრულებენ დავალებებს. მათ ზუსტად იციან, რომ საშინაო თუ საკლასო აქტივობა მეორეხარისხოვანი აღარ არის. მიხვდნენ, რომ ყოველი დღე, ყოველი შესრულებული სავარჯიშო მათი წინსვლისა და წარმატების ნაწილია. სიახლეების დანერგვა სწორედ მაშინ არის ბედნიერება, როცა ხედავ, როგორ იზრდებიან შენი მოსწავლეები აკადემიურადაც და პიროვნულადაც“.

 

მერი ჟორჟოლიანი ასევე ღიმილით გვიმხელს, რომ საგანმანათლებლო ხარისხის ამაღლებასთან ერთად, სკოლაში უდიდესი შვება მოიტანა მობილური ტელეფონების შეზღუდვამ, რამაც საკლასო ოთახებს ნამდვილი სიმშვიდე დაუბრუნა. როგორც ირკვევა, ახალი წესების წყალობით, მოსწავლეებს ტელეფონები სკოლაში აღარც კი მოაქვთ, რადგან კარგად იციან, რომ სასწავლო პროცესში მაინც ვერ გამოიყენებენ.

 

„ამ გადაწყვეტილებით, მარტივად რომ ვთქვათ, ერთიანად დაისვენა სრულიად სასკოლო საზოგადოების ნერვებმაც და თვალებმაც. ბავშვები გაცილებით კონცენტრირებულები არიან, ხოლო შესვენებებზე ეკრანების ნაცვლად ერთმანეთთან ცოცხალ, თბილ კომუნიკაციას დაუბრუნდნენ. სიახლეების დანერგვა სწორედ მაშინ არის ბედნიერება, როცა ხედავ, როგორ ჯანსაღ გარემოში იზრდებიან შენი მოსწავლეები“, - ამბობს ჯემალ გაბულდანის სახელობის, ბეჩოს საჯარო სკოლის დირექტორი.