სკოლებში მობილური ტელეფონების გამოყენების შეზღუდვიდან თითქმის ერთი თვის თავზე, საგანმანათლებლო დაწესებულებები ახალი რეალობის პირველ შედეგებს აჯამებენ - პრაქტიკამ აჩვენა, რომ ცვლილებამ ყველაზე თვალსაჩინო და რადიკალური გარდატეხა დაწყებითი საფეხურის მოსწავლეებში შეიტანა. უმცროსი ასაკის ბავშვები, რომლებიც ყველაზე მარტივად ვარდებიან ციფრული დამოკიდებულების ქვეშ, ახალ წესებს საოცარი სისწრაფით შეეგუვნენ.
მთავარი მიღწევა, რაც ამ მოკლე დროში გამოიკვეთა, არის არა უბრალოდ სკოლაში ტელეფონის მალვა ან გათიშვა, არამედ მოსწავლეების მხრიდან ამ საჭიროების სრული გაქრობა. ბავშვებმა ეკრანებზე დამოკიდებულება ჯანსაღი სასკოლო რუტინით ჩაანაცვლეს, რამაც მნიშვნელოვნად აამაღლა მათი ჩართულობა როგორც საგაკვეთილო პროცესში, ისე თანატოლებთან ურთიერთობაში.
აღნიშნულ ტენდენციასა და მიღწეულ შედეგებს აფასებს ჭიათურის მუნიციპალიტეტის, ითხვისის N1 საჯარო სკოლის დირექტორი, მაყვალა ნოზაძე:
„დაწყებითი საფეხურის მოსწავლეებს სკოლაში ტელეფონები აღარც კი დააქვთ. ეს არის უდიდესი წინ გადადგმული ნაბიჯი, რადგან სწორედ ამ ასაკში ყალიბდება ბავშვის ყურადღების კონცენტრაციისა და სოციალიზაციის უნარები. ცვლილებას უკიდურესად დადებითად ვაფასებ. კლასებში სრულიად გაქრა ტელეფონით გამოწვეული დისტრაქცია და ხმაური. ბავშვები მთლიანად ჩართულები არიან სწავლის პროცესში, ხოლო დასვენებებზე ერთმანეთს ეკონტაქტებიან, თამაშობენ და რეალური ბავშვობით ტკბებიან, რაც ტექნოლოგიების ეპოქაში ასე გვაკლდა“.
ითხვისის N1 საჯარო სკოლის მაგალითი ნათლად ადასტურებს, რომ მობილურების გარეშე დარჩენილმა სასკოლო სივრცემ ბავშვებს სწავლის მოტივაცია და რეალური მეგობრობის სიხარული დაუბრუნა.
