eSchool-ის სისტემის განახლებული ვადები ცნობილია, რომლებიც წინსვლის მსურველ მასწავლებლებს ეხებათ.
2026 წლის 24 სექტემბრის ჩათვლით შესაძლებელი იყო სისტემაში ფუნქციების დამატება, ხოლო 25 სექტემბრიდან სკოლის დირექტორებს აღნიშნული ფუნქციები უნდა გადაენაწილებინათ პედაგოგებისთვის, რისთვისაც 5 დღიანი ვადა აქვთ.
ასე რომ, 30 სექტემბერი ბოლო დღეა, რათა პედაგოგებზე ხელმძღვანელებმა ფუნქციები გაანაწილონ.
როგორ ხდება სკოლის მიერ საჭიროებების განსაზღვრა და ფუნქციის გადანაწილება - მასწავლებელთა კარიერული წინსვლის სქემაში ვკითხულობთ:
სასწავლო წლის დაწყებამდე სკოლა თვითშეფასების მიზნით აანალიზებს საკუთარ საქმიანობას და განსაზღვრავს საჭიროებებს მასწავლებლის/სპეციალური მასწავლებლის კარიერული წინსვლის სამი მიმართულების შესაბამისად.
სკოლის მიერ საჭიროებების განსაზღვრა ეფუძნება თვითშეფასებით იდენტიფიცირებულ გამოწვევებსა და განვითარებაზე ორიენტირებულ მიზნებს.
საჭიროებების საფუძველზე, სკოლა განსაზღვრავს შესაბამის ფუნქციებს მასწავლებლის/სპეციალური მასწავლებლის კარიერული წინსვლის თითოეული მიმართულებით და სასწავლო წლის დასაწყისში უნაწილებს მათ სკოლის დონეზე ფუნქციის შესრულების ვალდებულების მქონე მასწავლებლებს/სპეციალურ მასწავლებლებს.
შეგახსენებთ: წამყვან მასწავლებელს/წამყვან სპეციალურ მასწავლებელსა და მენტორ მასწავლებელს/მენტორ სპეციალურ მასწავლებელს ვალდებულება აქვს ფუნქცია შეასრულოს მხოლოდ ერთ დონეზე, მხოლოდ ერთი მიმართულებით;
ასევე ფუნქციის შესრულების უფლების მოპოვების მსურველ მასწავლებელს/სპეციალურ მასწავლებელს უფლება აქვს კარიერული წინსვლისთვის ფუნქცია შეასრულოს მხოლოდ ერთ დონეზე, მხოლოდ ერთი მიმართულებით.
