2026 წლის 15 სექტემბერს საქართველოში სასწავლო პროცესი განახლდა, თუმცა მოსწავლეებისა და აღსაზრდელებისთვის სიხარული ხანმოკლე აღმოჩნდა - სწავლის დაწყებიდან  რამდენიმე დღეში, ქვეყნის მასშტაბით ათზე მეტ საგანმანათლებლო დაწესებულებაში პროცესი მოულოდნელად შეწყდა. მიზეზი: ექსპერტიზის მიერ მძიმე ავარიულად მიჩნეული შენობები და ინფრასტრუქტურული კოლაფსი.

სასწავლო წლის დაწყებიდან სულ რაღაც 2-3 დღეში, ლევან სამხარაულის სახელობის ექსპერტიზის ბიუროს დასკვნების საფუძველზე, უსაფრთხოების მოტივით სასწრაფოდ შეწყდა სწავლა 10-მდე საჯარო სკოლაში. ირკვევა, რომ ეს შენობები კრიტიკულად ავარიულია და იქ ბავშვების გაჩერება საფრთხეს უქმნიდა მათ სიცოცხლეს - ნაწილი დემონტაჟს ექვემდებარება, ნაწილს კი კაპიტალური რეაბილიტაცია სჭირდება.

გთავაზობთ იმ სკოლების ჩამონათვალს, სადაც პირველი ზარი დაირეკა, თუმცა კარი მალევე ჩაირაზა:

თბილისის N21 საჯარო სკოლა (სწავლის დაწყებიდან 2 დღეში მიიღეს დემონტაჟის გადაწყვეტილება ფასადის ჩამოშლის საფრთხისა და გაუმართავი სისტემების გამო);

ზესტაფონის N3 საჯარო სკოლა (სწავლის დაწყებიდან 2 დღეში მშობლებს სასწრაფო წესით აცნობეს  რემონტის საჭიროება);

მისაქციელის საჯარო სკოლა (სწავლის დაწყებიდან 2 დღეში დაიკეტა, რასაც ადგილზე მშობლების  პროტესტი მოჰყვა, რადგან სკოლა 15 სექტემბერს საზეიმოდ გახსნეს);

წყალტუბოს N2 საჯარო სკოლა (სწავლის დაწყებიდან 3 დღეში დაიკეტა);

ხაშურის N5 საჯარო სკოლა;

გურჯაანის N3 საჯარო სკოლა;

ველისციხის საჯარო სკოლა;

ანაგის საჯარო სკოლა;

თბილისის N81 საჯარო სკოლა - რომელიც თავდაპირველად არ მიიჩნეოდა საფრთხის შემცველად და სადაც სწავლაც ჩვეულ რეჟიმში დაიწყო. თუმცა, სექტემბრის მესამე კვირას ერთ-ერთ საკლასო ოთახში ჭერი ჩამოინგრა. მართალია, ინციდენტს მძიმე შედეგი არ მოჰყოლია, თუმცა უსაფრთხოების უზრუნველსაყოფად, სასწავლო პროცესი ამ სკოლაშიც 1 კვირით შეჩერდა.

სააღმზრდელო პროცესი შეჩერებულია ქობულეთის მე-5 საბავშვო ბაღშიც: სწავლის დაწყების შემდეგ გაირკვა, რომ ზაფხულში დაწყებული სარემონტო სამუშაოები იმდენად გაჭიანურდა, რომ ოფიციალური კონტრაქტით მათი დასრულება მხოლოდ 2027 წლის იანვარში იგეგმება. შესაბამისად, ბაღმა ფუნქციონირება საერთოდ ვერ შეძლო.