გიორგი ჭყონდიდელის სახელობის ქალაქ ფოთის N7 საჯარო სკოლის მოსწავლეები ზაფხულის არდადეგებზეც არ წყვეტენ სწავლასა და განვითარებას.
მათ შორისაა, სკოლის XIბ კლასის მოსწავლე დაჩი ფუტკარაძე, რომელმაც ერთი კვირა „რობოტექნიკის საზაფხულო სკოლაში“ გაატარა.
აღსანიშნავია, რომ გორში გამართული თემატური ახალგაზრდული ბანაკის მეორე ნაკადი „რობოტექნიკის საზაფხულო სკოლას“ დაეთმო. პროექტში მონაწილეობდა ფოთის N7 საჯარო სკოლის მოსწავლე დაჩი ფუტკარაძე.
ბანაკის მონაწილეებს ახალგაზრდობის სააგენტოს ხელმძღვანელი ალექსანდრე ქაჯაია და მისი პირველი მოადგილე თორნიკე შუბითიძე შეხვდნენ. შეხვედრის ფარგლებში ახალგაზრდები გაეცნენ სააგენტოს სერვისებსა და განვითარების შესაძლებლობებს, ასევე ისაუბრეს საკუთარ იდეებსა და ინიციატივებზე.
შვიდდღიანი საბანაკე პროგრამის ფარგლებში მოსწავლეები თემატურ ტრენინგებში, გუნდურ შეჯიბრებებსა და შემოქმედებით ღონისძიებებში იყვნენ ჩართულნი. ისინი ასევე მონაწილეობდნენ შემეცნებით ექსკურსიაში და რობოტექნიკისა და თანამედროვე ტექნოლოგიების მიმართულებით ცოდნა გაიღრმავეს.
ბანაკის მიზანია არაფორმალური განათლების მეთოდების გამოყენებით ახალგაზრდების პიროვნული და სოციალური კომპეტენციების განვითარება, ჯანსაღი ცხოვრების წესისა და სოციალური პასუხისმგებლობის პოპულარიზაცია, აქტიური მოქალაქეობისა და პატრიოტული ღირებულებების შესახებ ცნობიერების ამაღლება.
