ძლიერი სიცხის გამო დაიხურა საბავშვო ბაღები და სკოლები - საფრანგეთში „წითელი" დონე ამოქმედდა
22-06-2026
ევროპის რამდენიმე ქვეყანაში ჰაერის ტემპერატურა 40 გრადუს ცელსიუსს უახლოვდება, კონტინენტზე ხანგრძლივი სიცხისთვის ემზადებიან, – ამის შესახებ ინფორმაციას „როიტერი“ ავრცელებს.
გამოცემა წერს, რომ ტემპერატურის მკვეთრად მომატების გამო რამდენიმე ქვეყანაში ხელისუფლებამ სპეციალური გაფრთხილებები გამოსცა, შეფერხებულია სატრანსპორტო გადაადგილება და დახურულია სხვადასხვა დაწესებულებები.
საფრანგეთის დიდ ნაწილში, ექსტრემალური სიცხის გამო, განგაშის უმაღლესი, „წითელი“ დონე ამოქმედდა. სინოპტიკოსების პროგნოზით, ქვეყნის დასავლეთით ტემპერატურა 40 გრადუსს გადააჭარბებს, ბორდოში კი რეკორდულ 43 გრადუსს მიაღწევს.
გაუსაძლისი სიცხის გამო, ქვეყანაში 2 600-ზე მეტ სკოლაში სასწავლო პროცესი შეწყდა ან შეიზღუდა. სამხრეთ-დასავლეთ რეგიონში კი მაღალი ტემპერატურით გამოწვეული გართულებების შედეგად უკვე სამი ადამიანი გარდაიცვალა.
ტემპერატურის გამო ყოველწლიურ მუსიკალურ ფესტივალებზე ალკოჰოლის მიღება აიკრძალა.
35 გრადუს ცელსიუსზე მაღალი ტემპერატურის რამდენიმე დღის განმავლობაში შენარჩუნების შემდეგ იტალიის ხელისუფლებამ 21 ივნისიდან რვა ქალაქში, მათ შორის ბოლონიაში, ფლორენციაში, მილანსა და ტურინში, განგაშის წითელი დონე გამოაცხადა.
ესპანეთის მეტეოროლოგიურმა სააგენტომ რამდენიმე რეგიონში განგაშის წითელი და ნარინჯისფერი დონე გამოაცხადა. მათი თქმით, მაღალი ტემპერატურა მომდევნო დღეებშიც შენარჩუნდება.
„როიტერი“ წერს, რომ ტემპერატურის მატებას კონტინენტზე საჰარის უდაბნოს ჩრდილოეთიდან მოძრავი ცხელი ჰაერის მასა იწვევს. მეტეოროლოგების თქმით, აღნიშნული ქმნის ე.წ. სითბურ გუმბათს, რომელიც დასავლეთ და ცენტრალური ევროპის თავზე ცხელ ჰაერს აკავებს და ტემპერატურის მატებას უწყობს ხელს.
სკოლების სიახლეები
