ყვარლის N2 საჯარო სკოლის „წიგნის კლუბმა”, რომლის ხელმძღვანელიც გახლავთ ქართული ენისა და ლიტერატურის პედაგოგი მზია ბაიდოშვილი, საზოგადოების წინაშე წარადგინა ბრწყინვალე შემეცნებითი ლიტერატურული პროექტი - „სიტყვიდან სიტყვამდე“. 

პროექტი მოიცავდა ქართველ მთარგმნელთა საქმიანობასა და ქართული მთარგმნელობითი ტრადიციის გაცნობას.

მოეხსენება საზოგადოებას, რომ ქართული მთარგმნელობითი სკოლის სათავეებთან დგას ჯერ კიდევ შუა საუკუნეების ეპოქა, როდესაც ბიბლიური ტექსტების, ფილოსოფიური ნაშრომებისა და სხვათა გადმოქართულება გახდა ეროვნული აზროვნების ნაწილი.

ამ დიდებულ პროექტში უცხო ენების კათედრაც მონაწილეობდა. კლუბის წევრებმა ისაუბრეს ოთარ ცისკაძეზე, ქართველ მთარგმნელზე, რომელიც განსაკუთრებულ ყურადღებას უთმობს უცხოურ პოეზიასა და კლასიკური ლიტერატურის ქართულად შეცნობას. მისი საქმიანობა განსაკუთრებით ფასდება პოეზიის მოყვარულთათვის.

მისი თარგმანების შორისაა უილიამ შექსპირის სონეტები და სხვა კლასიკური დასავლური პოეტების ტექსტები, რომლებიც წარდგენილია ქართულ ენაზე სხვადასხვა პლატფორმაზე და ჟურნალებში. რუსული პოეზიიდან მას ნათარგმნი აქვს ანა ახმატოვას, ალექსანდრე პუშკინის, მარინა ცვეტაევას, მიხეილ ლერმონტოვის, ალექსანდრე ბლოკის, ოსიპ მანდელშტამის, ტატიანა სნეჟინას, სერგეი ესენინის, იოსებ ბროდსკის, ათანასე ფეტის, თედორე ტიუტჩევის, ნიკოლაი ზაბოლოცკის, ბორის პასტერნაკის, ბულატ ოკუჯავას ლექსები. აგრეთვე - პაოლო იაშვილზე, რომელმაც თარგმნა ალექსანდრე პუშკინის პოეზია. მის მიერ ნათარგმნი ლექსი ქართულად მხატვრული ოსტატობით წარმოადგინა იასე უძილაურმა, ხოლო პუშკინის პორტრეტი შეასრულა მარიამ სიხარულიშვილმა; ასევე ქეთი შავგულიძემ წარმოადგინა შოთა ნიშნიაძის მიერ ნათარგმნი ანდრეი ვოზნესენსკის ლექსი „პარაბოლური ბალადა”…

როგორც სკოლაში აღნიშნავენ, პროექტი გახლდათ ძალიან საინტერესო თავისი ეროვნული მოტივებითაც -  პირველი პრეზიდენტის, ზვიად გამსახურდიას ლიტერატურული და მთარგმნელობით ღვაწლის აღნიშვნით; შექსპირის სონეტებით დამშვენებული და ინსცენირებით „რომეო და ჯულიეტას” ტრფიალიდან (რომეო - იასე უძილაური, ხოლო ჯულიეტა - ნინო ონოფრიშვილი).

„მინდა ხაზგასმით აღვნიშნო, რომ, როდესაც საქართველოს ეზრდება უფლის მიერ დაჯილდოებული მრავალმხრივი ნიჭიერებით სავსე ახალგაზრდობა, განა საქართველოს ოდესმე გაუჭირდება?!.

მე ძალიან, ძალიან ამაყი ვარ ჩვენი მოსწავლეებით და უდიდესი მადლობა მათ, მკითხველთა კლუბის წევრებს, ხელმძღვანელს და დირექციას.

სტუმართა შორის ბრძანდებოდნენ ყვარლელი პოეტები: გიორგი ზუბიტაშვილი, ლია გიგიტაშვილი და იზოლდა იოსებიანი. პოეტმა ლია გიგიტაშვილმა (თამარელი) მკითხველთა კლუბს საჩუქრად გადასცა საავტორო პოეზიის კრებული „გამთენიის გზავნილები“,- გვიყვება პროექტის ხელმძღვანელი მზია ბაიდოშვილი. 

სკოლის დირექტორმა, ლეილა ქოჩორაშვილმა, მკითხველთა კლუბი დააჯილდოვა სიგელით - „2025-2026 სასწავლო წელს აქტიური და წარმატებული საქმიანობისთვის“, ხოლო პედაგოგი მზია ბაიდოშვილი დააჯილდოვა სიგელით - „მოსწავლეთა მაღალი სულიერი და ინტელექტუალური ღირებულებების პიროვნებად ჩამოყალიბებაში გაწეული შრომისთვის“.