ნამდვილი განათლება იქ იწყება, სადაც წიგნის ფურცლებიდან პერსონაჟები ცოცხლდებიან და ბავშვის წარმოსახვასა და რეალურ სამყაროს შორის მყარ ხიდს აგებენ. ზუსტად ასეთი აღმოჩნდა ნინოწმინდის N4 საჯარო სკოლის მესამე კლასის მოსწავლეების ქართული ენისა და ლიტერატურის გაკვეთილი, სადაც ბავშვებმა სამყაროს უმნიშვნელოვანეს ფასეულობებზე - „კარგსა და ცუდზე“ - დაფიქრება შემოქმედებითი თამაშით შეძლეს.
გაკვეთილის მთავარ თემას მარადიული კითხვები და ღირებულებები შეადგენდა. მოსწავლეებმა დიდი ინტერესითა და სიღრმისეულად შეისწავლეს სულხან-საბა ორბელიანის იგავი „ორი ამხანაგი“. ბავშვებმა წაიკითხეს ტექსტი, იმსჯელეს მეგობრობასა და იმაზე, ნამდვილი მეგობარი გასაჭირში რომ არ უნდა მიატოვო, შემდეგ კი ტესტური დავალებები შეასრულეს.
კომპლექსური დავალების ფარგლებში ბავშვებმა გაბედულად მოირგეს ჟურნალისტის როლი და წარმოადგინეს ინტერვიუ პერსონაჟებთან. პატარა „ჟურნალისტები“ სვამდნენ კითხვებს და იღებდნენ პასუხებს... მათ გაიაზრეს, რამდენად მარტივია შეცდომის დაშვება და რამდენად ფასეულია ერთგულება.
აღნიშნული აქტივობით, ნინოწმინდის N4 საჯარო სკოლის მესამეკლასელებმა დაამტკიცეს, რომ უყვართ კითხვა, იაზრებენ წაკითხულს და სწორი დასკვნების გამოტანაც შეუძლიათ.
