ყვარლის მუნიციპალიტეტის სოფელ საბუეს საჯარო სკოლის მე-4 კლასელებმა ნაყოფიერი ოთხი წელიწადი ღონისძიებით შეაჯამეს.
გამოსაშვები ღონისძიება მეტად საინტერესოდ წარიმართა და არაერთი საგანმანათლებლო თუ შემოქმედებითი ნომერი გააერთიანა. მე-4 კლასის მოსწავლეები სასკოლო საზოგადოების წინაშე მრავალფეროვანი საზეიმო პროგრამით წარდგნენ, ბავშვებმა 4 წლის განმავლობაში ნასწავლი მასალა გაიხსენეს, აღნიშნეს სასწავლო მიღწევები და ცოდნა წარმოაჩინეს.
მე-4 კლასელებმა დაწყებითი საფეხურის ოთხწლიანი გზა შეაჯამეს. ლამაზი ლექსებითა და სიმღერებით წარდგნენ მაყურებლის წინაშე. სლაიდების საშუალებით ეკრანზე გააცოცხლეს 4 წლის მანძილზე სკოლის კედლებში გატარებული საუკეთესო, მხიარული და აღმოჩენებით სავსე მომენტები.
ყველაზე ემოციური მაინც საყვარელ, პირველ მასწავლებლებთან დამშვიდობების წუთები იყო - ადამიანებთან, რომლებმაც მათ წერა-კითხვასთან ერთად მეგობრობა, ერთგულება და სიყვარული ასწავლეს.
„გილოცავთ დაწყებითი საფეხურის წარმატებით დასრულებას! წინ კიდევ უფრო საინტერესო, ცოდნითა და ახალი აღმოჩენებით სავსე წლები გელოდებათ.
მადლობა მასწავლებლებსა და მშობლებს ამ ლამაზი წლების განმავლობაში ბავშვების გვერდით დგომისა და ასეთი ლამაზი დღის შექმნისთვის!“, - აღნიშნავენ სკოლაში და მოსწავლეებს უსურვებენ ასეთივე შემართებით გააგრძელონ სწავლა და ასახელონ მასწავლებლები, სკოლა და ქვეყანა.
ღონისძიებას ორგანიზება გაუკეთეს მასწავლებლებმა - თამარ დომელიშვილმა და ნანა ზაალიშვილმა.
იხილეთ ფოტოები:
