ვაჟა-ფშაველას სახელობის ქალაქ რუსთავის №23 საჯარო სკოლის მე-3გ კლასში (მასწავლებელი: ეკატერინე იაშვილი) განხორციელდა საინტერესო და შემეცნებითი პროექტი - „გაიცანი საქართველო“, რომელმაც ბავშვები სამშობლოს აღმოჩენისა და გაცნობის საოცარ მოგზაურობაში წაიყვანა.
როგორც სკოლაში გვეუბნებიან, პროექტის მიზანი იყო მოსწავლეებს უკეთ შეეცნოთ საქართველოს მრავალფეროვანი კუთხეები, მათი ტრადიციები, კულტურა, ბუნება და ის განსაკუთრებული თავისებურებები, რომლებიც ჩვენს ქვეყანას უნიკალურს ხდის.
პროექტზე მუშაობის პროცესში ბავშვებმა დიდი ინტერესით მოიძიეს ინფორმაცია საქართველოს სხვადასხვა კუთხის შესახებ. ისინი გაეცნენ თითოეული რეგიონის ისტორიას, ღირსშესანიშნაობებს, ტრადიციებს, ეროვნულ სამოსს, სამზარეულოსა და კულტურულ მემკვიდრეობას. პატარებმა არა მხოლოდ ახალი ცოდნა შეიძინეს, არამედ საკუთარი თვალით დაინახეს, რამდენად მრავალფეროვანი და საინტერესოა ჩვენი ქვეყანა.
როგორც სკოლაში აღნიშნავენ, პროექტი შემოქმედებითი და გუნდური მუშაობის ნამდვილ სივრცედ იქცა. მოსწავლეები დიდი მონდომებით ჩაერთნენ თითოეულ აქტივობაში, წარმოადგინეს თავიანთი ნამუშევრები და კიდევ ერთხელ იგრძნეს, რომ საქართველო მხოლოდ რუკაზე მონიშნული ქვეყანა კი არა, მრავალფეროვანი, ფერადი და სიყვარულით სავსე სახლია.
„ასეთი აქტივობები ხელს უწყობს მოსწავლეებში კვლევითი უნარების, შემოქმედებითი აზროვნების, გუნდური მუშაობისა და საკუთარი ქვეყნის სიყვარულის გაღრმავებას. განსაკუთრებით მნიშვნელოვანია, როდესაც ბავშვები ცოდნას მხოლოდ წიგნებიდან კი არ იღებენ, არამედ თავად ხდებიან აღმოჩენისა და შემეცნების პროცესის მონაწილეები. „გაიცანი საქართველო“ ბავშვებისთვის მხოლოდ პროექტი არ ყოფილა - ეს იყო მოგზაურობა, რომელმაც კიდევ ერთხელ დაგვანახა, რომ სამშობლოს გაცნობა, მისი შეყვარების პირველი ნაბიჯია“,- ამბობენ სკოლაში და პროექტის მნიშვნელობას უსვამენ ხაზს.
იხილეთ ფოტოები:
