ქართული ფოლკლორი და მუსიკალური ტრადიციები ჩვენი იდენტობის უმნიშვნელოვანესი ნაწილია, რომლის შენარჩუნება და მომავალი თაობებისთვის გადაცემა თითოეული სკოლის უპირველესი მისიაა. სწორედ ამ იდეითა და დიდი შემოქმედებითი ენთუზიაზმით, ნინოწმინდის N4 საჯარო სკოლის მე-10 კლასის მოსწავლეებმა მუსიკაში მასშტაბური პროექტი - „ქართული ხალხური საკრავები“ განახორციელეს.
პროექტის მიზანი არა მხოლოდ თეორიული ცოდნის გაღრმავება, არამედ ქართული ტრადიციული მუსიკის პოპულარიზაცია იყო.
მოსწავლეების მიერ მომზადებული პრეზენტაციები გამოირჩეოდა განსაკუთრებული შინაარსით და გამდიდრებული იყო კრეატიული ელემენტებით. თითოეულმა ჯგუფმა თუ ინდივიდუალურმა გამომსვლელმა შეძლო, თეორიული მასალა ექცია საინტერესო და დინამიკურ სანახაობად.
პროექტის ყველაზე შთამბეჭდავი ნაწილი თავად ქართული ხალხური საკრავების გამოფენა აღმოჩნდა. მოსწავლეებმა საზოგადოებას თვალწინ გადაუშალეს უნიკალური ინსტრუმენტების სამყარო. საუბარი და მსჯელობა თითოეული საკრავის წარმომავლობაზე, ჟღერადობასა და დამზადების ტექნოლოგიაზე კიდევ უფრო თვალსაჩინო გახდა, რადგან ბავშვებს საშუალება ჰქონდათ, წარმოედგინათ ეს მუსიკალური საგანძური. ამ ვიზუალურმა და პრაქტიკულმა მხარემ პროექტს უდიდესი აკადემიური და ემოციური ღირებულება შეჰმატა.
ღონისძიების მთავარ მშვენებად და ნამდვილ ესთეტიკურ დღესასწაულად იქცნენ თავად პრეზენტატორები, რომლებიც სცენაზე ეროვნულ ტანსაცმელში გამოწყობილები წარდგნენ. ჩოხა-ახალუხისა და ქართული კაბების დიდებულებამ და მათმა პატრიოტულმა განწყობამ საოცარი ატმოსფერო შექმნა.
იდეის სულისჩამდგმელი და ხელმძღვანელი კი პედაგოგი ლეილა თელიაშვილი გახლდათ, რომლის პროფესიონალიზმმა და სწორმა მენტორობამ მოსწავლეებს შესაძლებლობების მაქსიმუმი გამოავლენინა. სკოლის ადმინისტრაცია და შემოქმედებითი გუნდი უღრმეს მადლობას უხდის მეათე კლასის მოსწავლეებს ასეთი გულმოდგინე ჩართულობისთვის - ნინოწმინდის N4 საჯარო სკოლამ კიდევ ერთხელ დაამტკიცა, რომ აქ ისეთი თაობა იზრდება, რომელსაც საქართველოს კულტურა უყვარს და უფრთხილდება მას.
