თანამედროვე განათლება დიდი ხანია გასცდა სახელმძღვანელოების ჩარჩოებს. ამის საუკეთესო მაგალითია თბილისის N28 საჯარო სკოლა, სადაც მოსწავლეები თეორიულ ცოდნას პრაქტიკული და საინტერესო აქტივობებით იმყარებენ. ბიომრავალფეროვნების საერთაშორისო დღესთან დაკავშირებით, სკოლაში მნიშვნელოვანი და შემეცნებითი პროექტი განხორციელდა.
პედაგოგ ლიანა ქსოვრელის ხელმძღვანელობითა და ეკო-კლუბ „ნეას“ წევრების აქტიური ჩართულობით, სკოლაში ჩატარდა პროექტი სახელწოდებით - „ბაღის ფრინველთა საათი“.
პროექტის ფარგლებში, სკოლის ეზო ნამდვილ სამეცნიერო-კვლევით სივრცედ იქცა. კლუბ „ნეას“ წევრები აქტიურად აკვირდებოდნენ ეზოს ბინადარ ფრინველებს, უსმენდნენ მათ გალობას და აწარმოებდნენ ნამდვილ დაკვირვებას.
ამ პრაქტიკულმა აქტივობამ მოსწავლეებს მისცა შესაძლებლობა, უშუალო კონტაქტი ჰქონოდათ ბუნებასთან, განევითარებინათ დაკვირვების, ანალიზისა და გარემოს აღქმის უნარები.
საველე დაკვირვების პარალელურად, პროექტი მოიცავდა ინტერაქციულ დისკუსიას. მოსწავლეებმა და პედაგოგმა იმსჯელეს:
საქართველოს ტერიტორიაზე გავრცელებულ ფრინველთა სახეობებზე.
ფრინველების უმნიშვნელოვანეს როლსა და სარგებელზე ეკოსისტემისთვის.
მათ საფრთხეებსა და დაცვის აუცილებელ მექანიზმებზე.
მოსწავლეებმა კიდევ ერთხელ გააცნობიერეს, თუ რამდენად მნიშვნელოვანია თითოეული ცოცხალი ორგანიზმის არსებობა ეკოლოგიური ბალანსის შესანარჩუნებლად.
აღსანიშნავია, რომ პედაგოგ ლიანა ქსოვრელის ეს ინიციატივა კიდევ ერთი დასტურია იმისა, რომ თბილისის N28 საჯარო სკოლა ორიენტირებულია არა მხოლოდ მაღალი აკადემიური ცოდნის გადაცემაზე, არამედ მოსწავლეებში სამოქალაქო პასუხისმგებლობისა და გარემოსდაცვითი ცნობიერების ამაღლებაზე.
