მეთორმეტეკლასელების მიერ ორგანიზებული ღონისძიება მრავალფეროვანი სასცენო ნომრებით გამოირჩეოდა. მოსწავლეებმა ხალისით გააცოცხლეს სასკოლო ცხოვრების დასამახსოვრებელი ეპიზოდები, შეასრულეს სიმღერები და ქართული ცეკვები, რითაც დამსწრე საზოგადოების განსაკუთრებული მოწონება დაიმსახურეს.

სადღესასწაულო განწყობა კიდევ უფრო გაამხიარულეს მოწვეულმა ანიმატორებმა, რომლებმაც ერთ-ერთ კურსდამთავრებულ იუბილარს დაბადების დღე მიულოცეს და დარბაზში პოზიტიური და მხიარული ატმოსფერო შექმნეს.

საღამოს განმავლობაში მოსწავლეებმა სიმბოლურად შეაჯამეს განვლილი თორმეტი წელი და მადლობა გადაუხადეს პედაგოგებს გაწეული შრომის, მხარდაჭერისა და უპირობო სიყვარულისთვის.

ღონისძიების დასასრულს სკოლის დირექტორმა და კლასის დამრიგებელმა კურსდამთავრებულებს თბილი სიტყვებით მიმართეს, წარმატებები უსურვეს და ცხოვრების ახალი ეტაპისკენ სიყვარულითა და საუკეთესო სურვილებით გააცილეს.