სკოლის ეზოში გაჟღერებული ბოლო ზარის ხმა ყოველთვის ახალი ცხოვრების დასაწყისია. წელს მარნეულის მუნიციპალიტეტის, ხიხანის საჯარო სკოლა კიდევ ერთ გამორჩეულ თაობას აცილებს. ეს არის დღე, როდესაც ერთმანეთს ერწყმის სკოლის კედლებში გატარებული 12 წლის სიხარული, მასწავლებლების მზრუნველი მზერა და მომავლის დიდი მოლოდინი.
„ჩვენი, პედაგოგების, უმთავრესი მისია მხოლოდ თეორიული ცოდნის გადაცემა არ ყოფილა; სკოლამ შეძლო აღეზარდა თავისუფალი, მოაზროვნე და მიზანდასახული მოქალაქეები, რომლებიც მზად არიან, ღირსეულად უპასუხონ თანამედროვე სამყაროს გამოწვევებს. აქ მიღებული განათლება არის მყარი საძირკველი, რომელზეც მათ საკუთარი მომავალი უნდა ააშენონ“, - ასე ეხმაურებიან სასკოლო საზოგადოების წარმომადგენლები მოსწავლეთა გაცილებას ცხოვრების ახალ ეტაპზე.
ჩვენ კი დავძენთ, რომ გამოსამშვიდობებელი დღე განსაკუთრებით ემოციური აღმოჩნდა მასწავლებლებისა და მშობლებისთვის. კურსდამთავრებულებმა თბილი სიტყვებითა და გულწრფელი მადლიერებით მიმართეს იმ ადამიანებს, რომლებიც წლების განმავლობაში მათ გვერდით იდგნენ, ამხნევებდნენ და თითოეულ წარმატებას მათთან ერთად ზეიმობდნენ. თეთრ პერანგებზე დატოვებული სამახსოვრო ჩანაწერები და სურვილები კი დარჩება იმ ლამაზ მოგონებად, რომელიც მათ მთელი ცხოვრების მანძილზე გაჰყვებათ.
