მფრინავთა საერთაშორისო დღე სკოლა „ჯეო სქაიში“ შთამბეჭდავად აღინიშნა. თარიღთან დაკავშირებით, სკოლა ერთ დიდ აეროპორტად გადაიქცა. სტიუარდესები, პილოტები, ავიაინჟინრები - ყველა ერთად შეიკრიბა, რათა ბავშვებისთვის ავიაციის ჯადოსნური სამყარო კიდევ უფრო ახლოს გაეცნო.

სკოლაში მიიწვიეს სკოლის პარტნიორი ავიაკომპანიის ხელმძღვანელი და თანამშრომლები, რომლებმაც ბავშვების ყველა კითხვას ამომწურავი და საინტერესო პასუხები გასცეს.

სკოლას სტუმრობდნენ:

• ავიაკომპანია TCA-ის ხელმძღვანელი თაკო ქორთოშიძე;
• პილოტები -  დავით ქააძე, გიორგი ქორიძე;
• უსაფრთხოების მენეჯერი - დავით მელანაშვილი;
• ავიაინჟინერი - გიორგი მელიქიშვილი;
• ავიამოდელირების პროგრამის ხელმძღვანელი - არჩილ ოთხმეზური.

როგორც სკოლაში აღნიშნავენ, ეს თარიღი განსაკუთრებული მნიშვნელობისაა სკოლა „ჯეო სქაისთვის“, რომლის სახელწოდებაც თავადვე მიანიშნებს ცასთან, თავისუფლებასა და დიდ მიზნებთან კავშირზე.

წელს ეს დღე სკოლაში განსაკუთრებული მასშტაბით, შემეცნებითი და გასართობი აქტივობებით აღინიშნა.

დღის განმავლობაში მოსწავლეებმა მონაწილეობა მიიღეს სხვადასხვა თემატურ პროექტში:

გაიმართა შემეცნებითი პრეზენტაციები: უფროსკლასელებმა მოამზადეს პრეზენტაციები ავიაციის ისტორიაზე ძმები რაიტებიდან თანამედროვე ხომალდებამდე.

პატარა „ჯეოსქაელებმა“ საკუთარი ხელით შექმნეს თვითმფრინავების მოდელები და ისწავლეს აეროდინამიკის საწყისები.

მოეწყო შეხვედრები პროფესიონალებთან. დღის კულმინაცია იყო შეხვედრა მოქმედ პილოტებთან, რომლებმაც მოსწავლეებს თავიანთი გამოცდილება გაუზიარეს და პროფესიის სირთულეებსა თუ სილამაზეზე ესაუბრნენ.

როგორც სკოლა „ჯეო სქაიში“ განმარტავენ, მსგავსი ღონისძიებები მიზნად ისახავს არა მხოლოდ ცოდნის გაღრმავებას, არამედ მოსწავლეებში იმ უნარების განვითარებას, რაც პილოტებისთვისაა დამახასიათებელი: დისციპლინა, სწრაფი გადაწყვეტილების მიღების უნარი და პასუხისმგებლობა.

მფრინავთა საერთაშორისო დღე 26 აპრილს აღინიშნება.

იხილეთ ფოტოები და ვიდეო