ბესიკ ხულორდავას სახელობის მარტვილის მუნიციპალიტეტის სოფელ სალხინოს საჯარო სკოლის პედაგოგები მოსწავლეებს ეროვნულ ღირებულებებზე ზრდიან და მომავალ თაობას ენის სიყვარულსა და ისტორიის პატივისცემას ასწავლიან. 

სკოლის მეორე კლასის მოსწავლეებმა საინტერესოდ აღნიშნეს დედაენის დღე. ამ მნიშვნელოვან ეროვნულ დღესასწაულს მიეძღვნა კლასის საათი თემაზე  - „დედაენა ჩვენი განძია!“

მოსწავლეებმა, მასწავლებელთან ერთად ისაუბრეს დედაენის დღის მნიშვნელობაზე, ენის მრავალსაუკუნოვან ისტორიაზე, დამწერლობის უნიკალურობაზე. ბავშვებმა ლექსებიც წაიკითხეს და ხოტბა შეასხეს ქართული ენის სიდიადეს. 

„ვისაუბრეთ ენის სიწმინდეზე, მის უნიკალურობაზე, რომელსაც ანალოგი არ მოეპოვება, რომელიც განძია ერისა! მოსწავლეებმა წაიკითხეს ლექსები, დახატეს და მოაწყვეს თავიანთი ნახატების გამოფენა“,- გვიყვებიან სკოლაში. 

ღონისძიებას ლაიტმოტივად გასდევდა სიტყვები - 

„საქართველოს მთებში გაგაჩინა ზენამ,

ხმათა ხავერდების და ღმერთების ენავ!“