დედოფლისწყაროს მუნიციპალიტეტის სოფელ სამთაწყაროს საჯარო სკოლაში, მოქალაქეობის მასწავლებლის - ნათია სვიმონიშვილის ორგანიზებით, VII–XII კლასის მოსწავლეებისთვის განხორციელდა მნიშვნელოვანი საგანმანათლებლო აქტივობა თემაზე - „ფინანსური არჩევანი უსაფრთხო მომავლისკენ“.

აღნიშნული აქტივობა უკავშირდება ფულის გლობალური კვირეულის Global Money Week-ის იდეას, რომლის აღნიშვნას საფუძველი 2012 წლიდან ჩაეყარა. ფულის გლობალური კვირეული ყოველწლიურად, გაზაფხულზე, მსოფლიოს 170-ზე მეტ ქვეყანაში იმართება და მისი მთავარი მისიაა ბავშვებსა და ახალგაზრდებში ფინანსური, ეკონომიკური და სამეწარმეო ცნობიერების ამაღლება და პოპულარიზება.

კვირეულის აღნიშვნას საქართველოს ეროვნული ბანკი და მასთან არსებული ფინანსური განათლების პლატფორმა „ფინედუ“ პარტნიორებთან ერთად უერთდება. მსგავსი საინფორმაციო შეხვედრები ახალგაზრდებში ფულთან დაკავშირებულ საკითხებზე ღია საუბარს, სწორი ინფორმაციის გაზიარებასა და ფინანსური განათლების მნიშვნელობის გააზრებას ემსახურება.

როგორც სკოლაში გვეუბნებიან, აქტივობის მთავარი მიზანი იყო მოსწავლეებში ფინანსური წიგნიერების ამაღლება, ფულის მართვის, დაზოგვის, ფინანსური გადაწყვეტილებების გააზრებულად მიღებისა და ფინანსური უსაფრთხოების მნიშვნელობის გააზრება. განსაკუთრებით მნიშვნელოვანი იყო მოსწავლეებს გაეგოთ, როგორ დაიცვან თავი „ფიშინგისგან“, ფინანსური თაღლითობისგან და როგორ მოიქცნენ პასუხისმგებლიანად პირადი მონაცემებისა და ფინანსური ინფორმაციის გამოყენებისას.

1-ელ მაისს სკოლაში გაიმართა შეხვედრა საქართველოს ბანკის ადგილობრივი ფილიალის წარმომადგენლებთან. შეხვედრას უძღვებოდნენ: ხათუნა ხუციშვილი ბანკის თანამშრომელი, თიკო ალადაშვილი ბანკის თანამშრომელი და ალიკა გოგაშვილი ბანკის მენეჯერი. სტუმრებმა მოსწავლეებს საინტერესოდ გააცნეს ლარის ისტორია, ეროვნული ბანკის ფუნქციები, ფინანსური ტერმინები, ფულის სწორად მართვის მნიშვნელობა და უსაფრთხო ფინანსური ქცევის ძირითადი წესები.

შეხვედრა წარიმართა ინტერაქტიულ რეჟიმში. მოსწავლეები აქტიურად მონაწილეობდნენ დისკუსიაში, სვამდნენ კითხვებს, მსჯელობდნენ რეალურ ცხოვრებისეულ მაგალითებზე, ჩაერთნენ ფინანსური ტერმინების გამოცნობასა და სახალისო ვიქტორინაში. აღნიშნულმა ფორმატმა ხელი შეუწყო მოსწავლეთა ინტერესის, ჩართულობისა და პრაქტიკული აზროვნების განვითარებას.

აქტივობის შედეგად მოსწავლეებმა უკეთ გაიაზრეს, რომ ფინანსური განათლება ყოველდღიური ცხოვრების მნიშვნელოვანი ნაწილია. მათ მიიღეს საჭირო ცოდნა ფულის გონივრულად გამოყენების, დაზოგვის, პირადი ბიუჯეტის დაგეგმვისა და ფინანსური საფრთხეების ამოცნობის შესახებ. ასევე, განუვითარდათ პასუხისმგებლიანი არჩევანის გაკეთების, კრიტიკული აზროვნების, კითხვების დასმისა და მიღებული ინფორმაციის პრაქტიკაში გამოყენების უნარები.

პროექტის ფარგლებში მიღებული ცოდნა მოსწავლეებს დაეხმარება მომავალში უფრო ფრთხილად, გააზრებულად და უსაფრთხოდ მიიღონ ფინანსური გადაწყვეტილებები.

სკოლის დირექტორი ეკატერინე ჩიტაური, მადლობას უხდის მოქალაქეობის მასწავლებელს - ნათია სვიმონიშვილს, საქართველოს ბანკის წარმომადგენლებს და ყველა მონაწილე მოსწავლეს და მასწავლებელს აქტიური ჩართულობისთვის. მსგავსი საგანმანათლებლო აქტივობები ხელს უწყობს მოსწავლეთა პრაქტიკული ცოდნის გაღრმავებას, პასუხისმგებლიანი მოქალაქეობრივი ქცევის ჩამოყალიბებას და მომავლისთვის საჭირო მნიშვნელოვანი უნარების განვითარებას.

„ვულოცავთ მოსწავლეებს წარმატებულ მონაწილეობას და ვუსურვებთ მათ გონივრულ, უსაფრთხო და წარმატებულ ფინანსურ მომავალს!“,- აღნიშნავენ სკოლაში. 

იხილეთ ფოტოები: