22 აპრილს, როდესაც მსოფლიო დედამიწის დღის გარშემო ერთიანდება, ჩხოროწყუს მუნიციპალიტეტის, მუხურის თემის საჯარო სკოლის პირველ კლასში ნამდვილი შემოქმედებითი და საგანმანათლებლო დღესასწაული მოეწყო. პედაგოგ ნანა გუჯეჯიანის ხელმძღვანელობით, სკოლის ყველაზე პატარა აღსაზრდელებმა დაამტკიცეს, რომ გარემოზე ზრუნვა და პლანეტის სიყვარული ასაკით არ განისაზღვრება. ეს დღე მათთვის იქცა არა მხოლოდ აქტივობების ერთობლიობად, არამედ პირველ დიდ ნაბიჯად მოქალაქეობრივი პასუხისმგებლობისკენ.
დღის განმავლობაში პატარებმა მასწავლებელთან ერთად ფერადი და შინაარსიანი კედლის გაზეთი დაამზადეს, თუმცა ღონისძიების ყველაზე ემოციური ნაწილი „დედამიწისთვის მიწერილი წერილები“ აღმოჩნდა. პირველკლასელებმა ფურცელზე გულწრფელად გადაიტანეს თავიანთი განცდები, ოცნებები და დაპირებები ჩვენი საერთო სახლის მიმართ. ამ გულწრფელმა გზავნილებმა კიდევ ერთხელ დაგვანახა, რამდენად სათუთად აღიქვამენ ბავშვები სამყაროს და როგორ სურთ მისი გაფრთხილება.
ნანა მასწავლებლის მიერ მომზადებულმა პრეზენტაციამ - „ბუნების ხმამ“, პატარები დააფიქრა იმ დიდ მისიაზე, რასაც დედამიწის მოფრთხილება ჰქვია.
