ქუთაისის N40 საჯარო სკოლაში საინტერესო ღონისძიება გაიმართა. სასკოლო პროექტის - „სამოქალაქო უსაფრთხოება შენი უსაფრთხოებისთვის“ ფარგლებში, მე-8 „ა“ კლასის მოსწავლეებმა წარმოადგინეს პრეზენტაცია თემაზე: „ეპიდემიები ისტორიაში და მათი გავლენა საზოგადოების უსაფრთხოებაზე“. ეს აქტივობა ორ დარგს - ისტორიასა და ბიოლოგიას შორის მჭიდრო თანამშრომლობის საუკეთესო მაგალითი აღმოჩნდა, რომელიც პედაგოგების, ლალი რობაქიძისა და შორენა დანელიას ინიციატივით განხორციელდა.

ღონისძიებას ესწრებოდნენ სკოლის დირექტორი, ქალბატონი ნინო ვარდოსანიძე, პედაგოგები, სკოლის ექიმი და მშობლები. პრეზენტაციის მიზანი არ ყოფილა მხოლოდ ფაქტების მშრალი მიმოხილვა; მოსწავლეებმა სიღრმისეულად შეისწავლეს ეპიდემიების გამომწვევი მიზეზები და პრევენციის გზები. ე.წ. იუსტინიანეს ჭირიდან და შავი სიკვდილიდან დაწყებული, ესპანური გრიპითა და თანამედროვეობის უდიდესი გამოწვევით - COVID-19-ით დამთავრებული, მოზარდებმა თვალსაჩინოდ აჩვენეს, თუ როგორ ცვლიდა დაავადებები მსოფლიოს რუკას, დემოგრაფიასა და ეკონომიკას. პრეზენტაცია გაჯერებული იყო ინფოგრაფიკებით, ვიდეორგოლებითა და სქემებით, რამაც რთული სამედიცინო და ისტორიული პროცესები ყველასთვის გასაგები და თვალსაჩინო გახადა.

განსაკუთრებული ყურადღება დაეთმო სამოქალაქო პასუხისმგებლობას. მოსწავლეებმა იმსჯელეს ვაქცინაციის, როგორც მედიცინის უდიდესი მიღწევის მნიშვნელობაზე, პირადი ჰიგიენის კულტურასა და სამედიცინო რეკომენდაციებისადმი ნდობაზე. მათი მსჯელობა იყო დასტური იმისა, რომ სკოლა ახალგაზრდებში არა მხოლოდ ცოდნას, არამედ კრიტიკულ აზროვნებასა და გააზრებულ სამოქალაქო პოზიციას აყალიბებს. პედაგოგების ღვაწლი სწორედ იმაში ვლინდება, რომ მათ შეძლეს მოსწავლეებისთვის დაენახვებინათ კავშირი წარსულის გამოცდილებასა და დღევანდელ უსაფრთხოებას შორის.