ნინოწმინდის მუნიციპალიტეტის, გორელოვკის N2 საჯარო სკოლაში დედაენის დღისადმი მიძღვნილი კვირეული ნამდვილ შემოქმედებით დღესასწაულად იქცა. ამ დღეებში სკოლის კედლებში ქართული სიტყვა განსაკუთრებული სიამაყით ჟღერდა, რამაც კიდევ ერთხელ დაადასტურა, რომ სახელმწიფო ენის პატივისცემა და სიყვარული ადგილობრივი მოსწავლეებისთვის უმთავრესი ღირებულებაა.
კვირეულის ფარგლებში გამართული კალიგრაფიის კონკურსი კი ერთ-ერთი ყველაზე შთამბეჭდავი ნაწილი აღმოჩნდა. მოსწავლეებმა საოცარი მონდომებითა და სიზუსტით გააცოცხლეს ქართული ასო-ბგერები, რომლებიც იუნესკოს მიერ მსოფლიო არამატერიალური კულტურული მემკვიდრეობის ძეგლადაა აღიარებული. თითოეული ნამუშევარი იყო არა მხოლოდ ლამაზი ხელწერა, არამედ მოსწავლეთა შინაგანი სამყაროსა და ქართული დამწერლობის უნიკალობის აღქმის გამოხატულება. პედაგოგების მაღალმა პროფესიონალიზმმა ხელი შეუწყო იმას, რომ ბავშვებმა ქართული დამწერლობა ხელოვნების ნიმუშად აღიქვეს.
ღონისძიების ფარგლებში ჩატარდა მხატვრული კითხვის კონკურსიც, სადაც ქართული პოეზიის მარგალიტები ახალი ემოციით აჟღერდა. მოსწავლეებმა დიდი შთაგონებით ისაუბრეს ქართული ენისა და ანბანის ისტორიულ მნიშვნელობაზე.
აღსანიშნავია, რომ მსგავსი ღონისძიებები კიდევ ერთხელ უსვამს ხაზს ქართული ანბანის უნიკალობას და ეხმარება მოსწავლეებს სრულფასოვან სამოქალაქო ინტეგრაციაში.
იხილეთ ვიდეო
