დედოფლისწყაროს მუნიციპალიტეტის სოფელ სამთაწყაროს საჯარო სკოლაში მოსწავლეთა ინიციატივები წახალისებულია, მათი აკადემიური მიღწევები კი საამაყო.
საერთო სასკოლო დილის თათბირზე, განსაკუთრებული სითბოთი და მადლიერებით აღინიშნა მოსწავლეთა მიერ განხორციელებული პროექტების მონაწილეთა დაჯილდოება.
სკოლის დირექტორმა - ეკატერინე ჩიტაურმა პროექტების - „მწვანე ინიციატივა - ჟოლოს ბაღიდან სასკოლო კეთილდღეობამდე“ და „პატარა ხელები დიდი სიყვარულით - ჩვენი წვლილი სკოლის გამწვანებაში“ ყველა მონაწილეს გულითადი მადლობა გადაუხადა და მადლობის სიგელებით დააჯილდოვა.
ეს იყო არა მხოლოდ დაჯილდოების, არამედ შრომის, ერთგულების, თანამშრომლობისა და სიყვარულით გაკეთებული საქმის აღიარების დღე. თითოეულმა სიგელმა კიდევ ერთხელ გაუსვა ხაზი იმას, რომ მოსწავლეთა ინიციატივა, მონდომება და სკოლაზე ზრუნვა შეუმჩნეველი არ რჩება, პირიქით, ის ფასდება, აღინიშნება და სხვებისთვისაც მისაბაძ მაგალითად იქცევა.
როგორც სკოლაში აღნიშნავენ, დაჯილდოების მიზანი იყო მოსწავლეთა წახალისება, მათი შრომის დაფასება და იმ ღირებულებების გაძლიერება, რომლებიც პასუხისმგებლობას, ეკოლოგიურ ცნობიერებას, გუნდურ მუშაობასა და სასკოლო გარემოზე მზრუნველ დამოკიდებულებას ეფუძნება.
„დაჯილდოების შედეგი გახდა უფრო მეტად მოტივირებული მოსწავლეები, გაძლიერებული ჩართულობა, საერთო საქმის მიმართ პასუხისმგებლობის ზრდა და სკოლის ცხოვრებაში აქტიური მონაწილეობის სურვილის კიდევ უფრო განმტკიცება“,- აღნიშნავენ სკოლაში.
ასეთი ლამაზი ჟესტები ხელს უწყობს სკოლაში პოზიტიური, მხარდამჭერი და შთამაგონებელი გარემოს შექმნას, სადაც თითოეული კარგი საქმე ფასდება, თითოეული ძალისხმევა აღინიშნება და თითოეული მოსწავლე გრძნობს, რომ მისი წვლილი მნიშვნელოვანია.
„სწორედ ასე იზრდება სიყვარული საკუთარი სკოლისადმი, ასე ყალიბდება ზრუნვის კულტურა და ასე იქმნება უკეთესი, უფრო ლამაზი და სიცოცხლით სავსე სასკოლო გარემო.
ვულოცავთ ყველა მონაწილეს ამ ღირსეულ დაფასებას და ვუსურვებთ კიდევ ბევრ წარმატებულ პროექტს ჩვენი სკოლის საკეთილდღეოდ!“,- დასძენენ სკოლაში და მოსწავლეთა წახალისებას აქტიურად აგრძელებენ.
იხილეთ ფოტოები:
