ლადო ასათიანის სახელობის, ცაგერის მუნიციპალიტეტის, ბარდნალის საჯარო სკოლისთვის 14 აპრილი განსაკუთრებულად საზეიმო და დატვირთული აღმოჩნდა. ქართული ენის დღესთან დაკავშირებით, სკოლის მოსწავლეები დიდი ენთუზიაზმით ჩაერთნენ ცაგერის სამხატვრო სკოლაში გამართულ მასშტაბურ ღონისძიებაში და ხაზგასასმელია, რომ ბარდნალელი ახალგაზრდებისთვის ეს დღე მხოლოდ კონკურსი არ ყოფილა; ეს გახლდათ შესაძლებლობა, კიდევ ერთხელ დაედასტურებინათ პატივისცემა მშობლიური ენისადმი და ღირსეულად წარმოეჩინათ მშობლიური სკოლის სახელი მუნიციპალურ დონეზე.
ბარდნალის საჯარო სკოლის მოსწავლეებმა საკუთარი ნიჭი მრავალფეროვან შემოქმედებით აქტივობებში გამოავლინეს. თემატურ გამოფენაზე წარმოდგენილი იყო მათი ნამუშევრები, სადაც კალიგრაფიის, მოლბერტსა თუ ასფალტზე ცარცით ხატვის კონკურსებში ბავშვებმა მაღალი ოსტატობა აჩვენეს. სკოლის თითოეული წარმომადგენელი ცდილობდა, ქართული ასო-ნიშნების გრაფიკული სილამაზე ინდივიდუალური ხედვით გადმოეცა. მათმა აქტიურობამ და კრეატიულობამ დამსწრე საზოგადოებისა და ჟიურის დიდი მოწონება დაიმსახურა, რაც კიდევ ერთხელ უსვამს ხაზს ბარდნალის სკოლაში არსებულ მაღალ შემოქმედებით დონეს.
ღონისძიების კულმინაცია დაჯილდოების ცერემონია გახდა, სადაც ბარდნალის საჯარო სკოლის მოსწავლეები არაერთი საპატიო სიგელით დაჯილდოვდნენ - ეს აღიარება კი სკოლის წარმატებული მუშაობისა და პედაგოგების თავდაუზოგავი შრომის შედეგია. სკოლის ადმინისტრაცია ამაყობს თავისი აღსაზრდელებით, რომლებმაც მშობლიურ სკოლას კიდევ ერთი საგანმანათლებლო გამარჯვება მოუტანეს.
ჩვენ კი აღვნიშნავთ, რომ ლადო ასათიანის სახელობის სკოლისთვის პირველ ადგილზეა ქართული სიტყვის დაცვა და ისეთი თაობების აღზრდა, რომლებიც ქართული კულტურული მემკვიდრეობის ღირსეული გამგრძელებლები იქნებიან.
