ჭიათურის მუნიციპალიტეტის სოფელ ითხვისის N1 საჯარო სკოლაში მოსწავლეები იძენენ არა მხოლოდ საგნობრივ ცოდნას, არამედ სიღრმისეულ ინფორმაციას იღებენ იმ თარიღებთან დაკავშირებით, რომლებიც გარდამტეხი აღმოჩნდა ჩვენი ქვეყნის ისტორიაში.
პედაგოგ მარიკა კურტანიძის საინფორმაციო შეხვედრა სადამრიგებლო კლასთან 9 აპრილის ტრაგიკულ მოვლენებს მიეძღვნა და მისი თემა გახლდათ - „გზა ტრაგედიიდან თავისუფლებამდე“.
როგორც სკოლაში გვეუბნებიან, შეხვედრის მიზანი იყო მოსწავლეებში ეროვნული თვითშეგნების ამაღლება და ისტორიული მეხსიერების გაღვივება. 1989 წლის 9 აპრილის მოვლენების მნიშვნელობის გააზრება, როგორც საქართველოს დამოუკიდებლობისა და თავისუფლების საძირკვლის. თავდადებული გმირების პატივისცემა და იმ სიმბოლიკის გაცნობა, რაც ქვეყნის ერთიანობას უკავშირდება.
განხორციელდა შემდეგი აქტივობები:
- საინფორმაციო სტენდის მომზადება: შეიქმნა სპეციალური ფორმატის სტენდი, სადაც განთავსდა ინფორმაცია 1989 წლის 9 აპრილის შესახებ. სტენდი ვიზუალურად ასახავდა გარდამავალ გზას ტრაგედიიდან გამარჯვებამდე.
- ვიდეორგოლის ჩვენება: მოსწავლეებმა ნახეს დოკუმენტური კადრები, რამაც მათ საშუალება მისცა, უკეთ აღექვათ იმდროინდელი მუხტი, ხალხის ერთიანობა და ეროვნული სულისკვეთება.
- სახელმწიფო ჰიმნის მოსმენა: შეხვედრა საზეიმო და ამაღელვებელ ტონზე წარიმართა, რამაც ხაზი გაუსვა სახელმწიფოებრივ სიმბოლოების მნიშვნელობას.
- შემოქმედებითი აქტივობა - „ტიტები“: მოსწავლეებმა გააფერადეს ტიტები და განათავსეს სტენდზე. აღსანიშნავია სიმბოლური ტრანსფორმაცია: თუ ადრე ტიტა მხოლოდ ტრაგედიის ნიშანი იყო, დღეს ის თავისუფლებისა და გამარჯვების ზეიმთან ასოცირდება.
- ბარათების კედელი: ბავშვებმა დაწერეს მცირე ბარათები, სადაც ერთმანეთს დაუკავშირეს 1989 წლის სიმტკიცე და 2026 წლის ფუნდამენტი - დამოუკიდებლობა და თავისუფლება.
შეხვედრის მთავარი გზავნილები და დევიზი შეხვედრის განმავლობაში მოსწავლეებმა თავად გამოკვეთეს ის ღირებულებები, რომლებიც ჩვენი ქვეყნის არსებობის საფუძველია. შეხვედრის დევიზი: „გზა ტრაგედიიდან თავისუფლებამდე“ მოსწავლეების მიერ დასახელებული მთავარი პრინციპები: ენა, მამული, სარწმუნოება! (ილიასეული ანდერძი) სამშობლო, ღმერთი, ადამიანი!
როგორც სკოლაში აღნიშნავენ, შეხვედრამ აჩვენა, რომ 11-ვე მოსწავლისთვის 9 აპრილი არ არის მხოლოდ ისტორიული თარიღი, არამედ ეს არის ცოცხალი მაგალითი იმისა, თუ როგორ იბადება თავისუფლება ერთიანობით.
„ტიტების გაფერადებითა და ბარათების გაკვრით მათ საკუთარი წვლილი შეიტანეს ამ დიდ ისტორიულ მეხსიერებაში“,- დასძენენ სკოლაში.
იხილეთ ფოტოები და ვიდეო:
