გომაროს საჯარო სკოლაში ჯანმრთელობის მსოფლიო დღის აღსანიშნავად საინტერესო აქტივობა მოეწყო
08-04-2026
ადიგენის მუნიციპალიტეტის სოფელ გომაროს საჯარო სკოლაში საინტერესო საგანმანათლებლო აქტივობა ჩატარდა, რომელიც ჯანმრთელობის მსოფლიო დღეს მიეძღვნა.
ღონისძიებაში მონაწილეობდნენ 1-ლიდან მე-10 კლასების ჩათვლით მოსწავლეები.
აქტივობას უძღვებოდა სკოლის ექთანი ქეთევან საგინაძე, რომელმაც მოსწავლეებს გააცნო პირველადი დახმარებისთვის საჭირო სამედიცინო ინვენტარი და მათი გამოყენების ძირითადი პრინციპები.
პრაქტიკული დემონსტრირების ფარგლებში მოსწავლეებმა მიიღეს ინფორმაცია:
- თითის, ხელის, ხერხემლისა და ფეხის მოტეხილობის შემთხვევაში დაზიანებული ნაწილის იმობილიზაციის (დაფიქსირების) წესების შესახებ;
- არტერიული წნევის გაზომვის მეთოდზე;
- სხეულის ტემპერატურის განსაზღვრაზე ელექტრონული თერმომეტრის გამოყენებით;
- ჭრილობის დამუშავების წესებზე ანტისეპტიკური საშუალების (ბეტადინი) გამოყენებით;
- ინჰალაციის აპარატის დანიშნულებასა და გამოყენების აუცილებლობაზე.
„აღნიშნული აქტივობა მიზნად ისახავდა მოსწავლეებში ჯანმრთელობის დაცვისა და უსაფრთხოების საბაზისო უნარ-ჩვევების განვითარებას, რაც მნიშვნელოვანია ყოველდღიურ ცხოვრებაში. ჯანმრთელობაზე ზრუნვა იწყება ცოდნით!“,- აღნიშნავენ სკოლაში და აქტივობის მნიშვნელობას უსვამენ ხაზს.
იხილეთ ფოტოები:
სკოლების სიახლეები
