თბილისის N64 საჯარო სკოლაში, რესურს ოთახის გუნდის ორგანიზებით, მე-2 კლასის მოსწავლეებთან ჩატარდა განსაკუთრებით სახალისო და, იმავდროულად, ძალიან ფუნქციური აქტივობა - „ვაფლის კაფე“.
მოსწავლეებმა თავად შექმნეს მენიუ, აირჩიეს სასურველი ვაფლი, გამოითვალეს ღირებულება და შეუკვეთეს.
მათ არა მხოლოდ მათემატიკური უნარები გამოიყენეს (დათვლა, რაოდენობის განსაზღვრა, ფასის გაანგარიშება), არამედ ივარჯიშეს არჩევანის გაკეთებაში, გადაწყვეტილების მიღებასა და სოციალური ინტერაქციის უნარებში.
ყველაზე საინტერესო ნაწილი კი იყო ის, რომ ბავშვებმა საკუთარი ხელით დაამზადეს ვაფლები, ინდივიდუალური გემოვნებით მორთეს და დიდი სიამოვნებით მიირთვეს.
როგორც სკოლაში გვეუბნებიან, აღნიშნული აქტივობა ხელს უწყობს:
- ფუნქციური აკადემიური უნარების განვითარებას;
- დამოუკიდებლობისა და პასუხისმგებლობის გაძლიერებას;
- სოციალური კომუნიკაციის პრაქტიკას;
- მოტივაციის ზრდას პრაქტიკული, რეალურ ცხოვრებასთან დაკავშირებული სწავლების გზით.
„სწავლა, რომელიც რეალურ გამოცდილებას ეყრდნობა, ბავშვებისთვის განსაკუთრებით საინტერესო და დასამახსოვრებელია. „ვაფლის კაფემ“ კიდევ ერთხელ გვაჩვენა, რომ სწავლა შეიძლება იყოს ერთდროულად ეფექტური, შემოქმედებითი და ძალიან გემრიელი“,- აღნიშნავენ სკოლაში.
იხილეთ ფოტოები:
