ზოგადი განათლების კანონში ცვლილებების შედეგად, 2026-2027 სასწავლო წელს პირველ კლასში ის ბავშვები ვეღარ დარეგისტრირდებიან, ვისაც 6 წელი 15 სექტემბრის შემდეგ შეუსრულდება. გადაწყვეტილებამ მშობელთა ნაწილის უკმაყოფილება გამოიწვია, განსაკუთრებით კი მათი, ვისი შვილებიც პრესქულში დადიოდნენ; საკანონმდებლო ცვლილებით კი გამოდის, იგივე პროგრამა კიდევ ერთი წლის განმავლობაში უნდა გაიარონ.
აქედან გამომდინარე, მშობელთა ნაწილმა პარლამენტში პეტიცია შეიტანა, 2026-2027 სასწავლო წელს პირველკლასელთა ასაკობრივი ზღვრის ცვლილებაზე გარდამავალი დებულების (გამონაკლისის) მოთხოვნით.
„გთხოვთ, 2026/2027 სასწავლო წლისთვის:
მშობლის გადაწყვეტილებით, ნებაყოფლობით, პირველ კლასში ჩარიცხვის უფლება მიეცეს 2020 წლის 16 სექტემბრიდან 31 დეკემბრის ჩათვლით დაბადებულ ბავშვებს;
სკოლისთვის მზაობის შეფასების მექანიზმის გამოყენებით მოხდეს იმ ბავშვების მზაობის შეფასება, რომელთაც 6 წელი უსრულდებათ 2026 წლის 16 სექტემბრიდან 31 დეკემბრის ჩათვლით და შეფასების საფუძველზე მოხდეს 2026-2027 სასწავლო წელს პირველ კლასში ჩარიცხვის შესახებ გადაწყვეტილების მიღება“, - ნათქვამია პეტიციაში, რომელიც მარიამ ბოხუამ შეიტანა უმაღლეს საკანონმდებლო ორგანოში.
პარლამენტის ბიურომ კი დაადგინა, რომ პეტიცია თანდართულ მასალებთან ერთად გადაეცემა საქართველოს პარლამენტის საპროცედურო საკითხთა კომიტეტს, რომელმაც 1 კვირის ვადაში უნდა შეამოწმოს ხელმოწერების ნამდვილობა და შედეგები წარუდგინოს საქართველოს პარლამენტის ბიუროს.
