პატარა მოქალაქის ოცნებას შეხვედროდა ქალაქის მერს ფრთა შეესხა - ახალქალაქის N4 საჯარო სკოლის მე-4ბ კლასის მოსწავლეს ქალაქის ხელმძღვანელმა უმასპინძლა.
საგანი „მე და საზოგადოება“ ბავშვებისთვის ხშირად არის გზამკვლევი მოქალაქეობრივი ცხოვრებისკენ. სწორედ ამ საგნის ფარგლებში, ერთ-ერთმა მეოთხეკლასელმა განსაკუთრებული აქტიურობა გამოიჩინა.
მე-4 კლასელისთვის გაკვეთილი სახელმძღვანელოს ფურცლებით არ დასრულებულა, მისმა ცნობისმოყვარეობამაც სკოლის კედლებს გარეთ გააღწია.
„მოსწავლე, რომელიც გამოირჩევა მხიარული ხასიათით, ყოველთვის მომზადებული და მოტივირებული ხვდება გაკვეთილებს, თუმცა თემამ „მერია“ მასში განსაკუთრებული ემოციები გამოიწვია. მოსწავლეს გაუჩნდა სურვილი - საკუთარი თვალით ენახა, როგორ მუშაობს ქალაქის მერი და პირადად გასაუბრებოდა მას“,- გვიყვებიან სკოლაში.
ბილინგვური სწავლების მასწავლებელმა, ვენერა ტიტოიანმა, რომელიც მუდმივად ზრუნავს მოსწავლეების წახალისებასა და მათ პრაქტიკულ განვითარებაზე, გადაწყვიტა მოსწავლის ეს ოცნება რეალობად ექცია. სწორედ პედაგოგის ძალისხმევით, დაიგეგმა შეხვედრა ახალქალაქის მერთან.
მერიაში ვიზიტი მოსწავლისთვის ნამდვილ დღესასწაულად იქცა. ქალაქის მერმა პატარა სტუმარი ძალიან თბილად მიიღო. მათ ისაუბრეს ქალაქზე, მოქალაქეობრივ პასუხისმგებლობასა და იმ საკითხებზე, რაც მეოთხეკლასელს ასე აინტერესებდა.
„ეს არ იყო მხოლოდ შეხვედრა, ეს იყო აღიარება იმისა, რომ ბავშვის ხმა და მისი ინტერესები მნიშვნელოვანია,“ - აღნიშნავენ სკოლაში.
შეხვედრის დასასრულს, მერმა მოსწავლეს სამახსოვრო საჩუქარიც გადასცა. ამ დღემ მნიშვნელოვნად აამაღლა ბავშვის თვითშეფასება და კიდევ უფრო მეტი მოტივაცია მისცა სწავლისა და განვითარების გზაზე.
ახალქალაქის N4 საჯარო სკოლა კიდევ ერთხელ ამტკიცებს, რომ სწორი მიდგომით, მასწავლებლის მხარდაჭერითა და საზოგადოების ჩართულობით, მოსწავლის ინტერესი შეიძლება იქცეს დიდ წარმატებად. ეს პატარა მეოთხეკლასელი კი დღეს უკვე დარწმუნებულია, რომ მონდომებასა და შრომას ყოველთვის მოაქვს შედეგი.
იხილეთ ფოტოები:
