12 დეკემბერს, ახალქალაქის მუნიციპალიტეტის სოფელ დადეშის საჯარო სკოლის განახლებულ საგანმანათლებლო ინფრასტრუქტურას საქართველოს განათლების, მეცნიერებისა და ახალგაზრდობის მინისტრი გივი მიქანაძე გაეცნო.
მინისტრთან ერთად დადეშის საჯარო სკოლის შენობა სამცხე-ჯავახეთის მხარეში სახელმწიფო რწმუნებულის მოადგილე სერგი მუშკუდიანმა, ახალქალაქი-ნინოწმინდის მუნიციპალიტეტების დელეგატმა სამველ მანუკიანმა, ახალქალაქის მერმა მელქონ მაკარიანმა, ახალქალაქის რესურსცენტრის უფროსმა თერეზა ჩივჩიანმა, მისმა მოადგილემ მანუჩარ მიქელაძემ და ახალქალაქის საკრებულოს თავმჯდომარე რუბენ პალიანმა დაათვალიერეს.
სკოლის ეზოში სტუმრებს მოსწავლე-მასწავლებლები ტრადიციული, პურითა და მარილით შეხვდნენ.
მინისტრი სკოლის მოსწავლეებს, მასწავლებლებსა და თანამშრომლებს შეხვდა და მათ თანამედროვე სტანდარტების შესაბამის საგანმანათლებლო გარემოში სწავლის გაგრძელება მიულოცა.
როგორც სკოლაში გვიყვებიან, მე-4 კლასის მოსწავლეებმა მინისტრის სტუმრობასთან დაკავშირებით, მოამზადეს მცირე წარმოდგენა.
„ბავშვებმა ქართულ ენაზე ზეპირად წაიკითხეს ლექსები სამშობლოს შესახებ, რითაც გაახარეს სტუმრები. ღონისძიების დროს ერთ-ერთმა მოსწავლემ ინერვიულა და იტირა. მინისტრმა ის დაამშვიდა და პროგრამა გაგრძელდა“,- გვიყვებიან სკოლაში.
სარეაბილიტაციო სამუშაოები სკოლაში საქართველოს განათლების, მეცნიერებისა და ახალგაზრდობის სამინისტროს ფინანსური მხარდაჭერით განხორციელდა.
იხილეთ ფოტოები:
