საგამოცდო ბარათების ამობეჭდვა დაიწყო - ინსტრუქციას გამოცდების ეროვნული ცენტრი აქვეყნებს
21-11-2025
პრაქტიკოს მასწავლებლებს და პრაქტიკოს სპეციალურ მასწავლებლებს, რომლებიც გამოცდებს 1-3 დეკემბერს აბარებენ, საგამოცდო ბარათების ამობეჭდვა 21 ნოემბრის 11:00 საათიდან შეეძლებათ.
საგამოცდო ბარათზე მითითებულია: საგამოცდო ცენტრის მისამართი, თითოეული გამოცდის თარიღი და გამოცდაზე რეგისტრაციის დაწყების დრო. ბარათის წარდგენა პირადობის დამადასტურებელ დოკუმენტთან ერთად გამოცდებზე დაშვების აუცილებელი პირობაა.
საგამოცდო ბარათის ამობეჭდვის დეტალური ინსტრუქცია:
- ვებგვერდზე online.naec.ge გამოყოფილ სპეციალურ ველებში გამოსაცდელმა უნდა ჩაწეროს პირადი თერთმეტნიშნა ნომერი და ცენტრის მიერ გაგზავნილი ხუთნიშნა კოდი, რითაც შევა სისტემაში;
- პირად გვერდზე აპლიკანტი დაინახავს ბმულს „დაბეჭდეთ თქვენი საგამოცდო ბარათი“;
- შესაძლებელია საგამოცდო ბარათის დამახსოვრება და ამობეჭდვა საჭირო დროს.
მნიშვნელოვანია, რომ მითითებული ინფორმაცია დაიბეჭდოს მკაფიოდ, ხარვეზების (წყვეტის, ლაქებისა და ა. შ.) გარეშე. ბარათის ამობეჭდვა გამოსაცდელებს შეუძლიათ შავ-თეთრად სტანდარტულ თაბახის ფურცელზე (A4).
გამოცდების ჩასატარებლად საგამოცდო ცენტრები თბილისსა და ქუთაისში გაიხსნება. იხილეთ მისამართები:
სსიპ - ქალაქ თბილისის N177 საჯარო სკოლა - ქ.თბილისი, დავით ჯაბიძის ქ. N38 (გლდანი, მე-5 მ/რ);
სსიპ - ქალაქ ქუთაისის N23 საჯარო სკოლა - ქ. ქუთაისი, არაყიშვილის ქ. №15.
შეფასებისა და გამოცდების ეროვნული ცენტრი სთხოვს ყველა მონაწილეს, ყურადღებით გაეცნოს ბარათზე მითითებულ ინფორმაციას და გაითვალისწინოს, რომ რეგისტრაციის დასრულების შემდეგ გამოცდაზე აღარ დაიშვება.
სკოლების სიახლეები
