სიღნაღის მუნიციპალიტეტის სოფელ საქობოს საჯარო სკოლაში პროექტებით სწავლება წარმატებით მიმდინარეობს. სასწავლო მეთოდი მოსწავლეთა სიღმისეულ სწავლებასა და ცოდნის პრაქტიკულ გამოყენებას მოიაზრებს, რაც მოსწავლეთა მრავალმხრივ განვითარებას ემსახურება.
ახლახან, სკოლის მე-9ა კლასის მოსწავლეებმა განახორციელეს პროექტი სახელწოდებით - „ტექსტი და მისი კინოვერსია“, რომლის თემა იყო - „ფესვები“.
პროექტს პედაგოგი ნინი სესიტაშვილი ხელმძღვანელობდა.
მოსწავლეებმა შეისწავლეს მიხეილ ჯავახიშვილის მოთხრობა - „მიწის ყივილი“ და უყურეს გუგული მგელაძის ფილმს - „ფესვები“.
მე-9 კლასელებმა ისაუბრეს მათ შორის კავშირსა და განსხვავებაზე, გაავლეს პარალელები ფილმსა და ნაწარმოებს შორის.
პროექტის ფარგლებში, მოსწავლეებმა ისაუბრეს:
- თუ რამდენად უწყობს ხელს ნაწარმოების თემის გაშლას კინოფილმის მუსიკა, კამერის კუთხე… რა შთაბეჭდილებას ახდენს ის მაყურებელზე?;
- რამდენად შეიცვალა ფილმის სცენარში მიხეილ ჯავახიშვილის ტექსტის სიუჟეტი, კომპოზიცია, პერსონაჟის ბიოგრაფია; რა ახალი დეტალები დაემატა მას… ვინაა მთხრობელი მოთხრობაში და ვინ ჩაანაცვლა იგი სცენარში?;
- სად და როგორ იკვეთება ფილმში კინოენისათვის დამახასიათებელი ჟანრული სპეციფიკა-ჩვენება თხრობის ნაცვლად;
- რამდენად და როგორ გააღრმავა ფილმის ნახვამ ნაწარმოების თემის თქვენეული აღქმა/გააზრება;
- როგორ აფასებთ რეჟისორის ინტერპრეტაციას?
პროექტი მოსწავლეებისთვის მეტად საინტერესო და სასწავლო-შემეცნებითი აღმოჩნდა. მოსწავლეებმა როგორც მიხეილ ჯავახიშვილის მოთხრობის მთავარი სათქმელი, ისე მისი ეკრანიზაცია სიღრმისეულად გაიაზრეს და გაანალიზეს.
იხილეთ ფოტოები:
