სკოლა „ანაბასისში“ ტრადიციად ქცეული საშემოდგომო დღესასწაული - „ანაბასისობა“ უკვე ათ წელზე მეტია სკოლის ეზოს ფერებით, სითბოთი და მხიარულებით ავსებს.
ეს დღე მხოლოდ შემოდგომის სურნელი კი არა, ერთიანობის, მეგობრობისა და სიყვარულის ზეიმია. წელს სკოლის ეზო ნამდვილ გამოფენად იქცა - თითოეულმა კლასმა საოცარი საშემოდგომო კუთხე მოაწყო.
მშობლებმა დიდი წვლილი შეიტანეს ამ მხიარულებაში: მათ მიერ მოტანილმა აქსესუარებმა შემოდგომის მთლიანი სიდიადე ასახა, ხოლო მასწავლებელთა ფანტაზიამ კუთხეებს ზღაპრული ელფერი შესძინა.
ღონისძიება მუსიკითა და ცეკვით დაიწყო - სცენაზე ერთმანეთს ენაცვლებოდა ქართული ეროვნული ცეკვები, პოპური და სამეჯლისო ცეკვები. მე-8 კლასელებმა მთიულური და აფხაზური განსაკუთრებული მონდომებით შეასრულეს და სცენას ნამდვილი ქართული სულის შთაჰბერეს.
შემდეგ სცენაზე მხიარული ბერიკები შემოიჭრნენ – მათ საშემოდგომო კუთხეებში სტუმრობა და „ტკბილეულის წართმევა“ განიზრახეს, თუმცა პატარები მედგრად დაუხვდნენ და თავიანთი ნამუშევრები გულით დაიცვეს. მათმა შეხლა-შემოხლამ მეტი მხიარულება შემატა დღესასწაულს.
„ანაბასისობა“ კიდევ ერთხელ გახდა ის დღე, როცა მოსწავლე, მშობელი და მასწავლებელი ერთ ოჯახად იქცა - სიყვარულით, სიხარულითა და საერთო მიზნებით გაერთიანებული.
„გილოცავთ „ანაბასისობას“ - აღმასვლის დღეს! ნათელი, უხვი და ბარაქიანი შემოდგომა გვეზეიმოს ყველას!“,- აღნიშნავენ სკოლაში და ტრადიციას სიხარულით აგრძელებენ.
აღსანიშნავია, რომ ღონისძიება გააშუქა ტელევიზია „არგომ“
