ლაგოდეხის მუნიციპალიტეტის, ცოდნისკარის საჯარო სკოლაში ახალი სასწავლო წელი წარმატებით დაიწყო; სკოლის კედლები მოსწავლეთა ჟრიამულმა აავსო, პედაგოგები დიდი სიყვარულით შეეგებნენ საკუთარ აღსაზრდელებს და ხელიხელჩაკიდებულნი შეუდგნენ ულამაზეს მოგზაურობას წიგნიერების ჯადოსნურ სამყაროში. მანამდე კი იყო მოლოდინი, სასიამოვნო მღელვარება და საოცარ ბავშვებთან შესახვედრად მზადება.
სწორედ ამ მოლოდინს ეძღვნება ჩანახატი, რომელსაც etaloni.ge უცვლელად გთავაზობთ:
„ილია ამბობს „მგზავრის წერილებში“, რა ცარიელია ეს ქვეყანა უადამიანოდო...
სკოლაც ობლად გამოიყურება მოსწავლის გარეშე.
ბავშვი სკოლის სულია, მისი მიზეზი, მიზანი და საზრისია.
მალე ეს საკლასო ოთახი შეივსება და აქაურობა სულ სხვა სახესა და იერს შეიძენს - დიალოგი გაცოცხლდება, ფიქრი გაიღვიძებს, კითხვები დაიბადება საინტერესო და სასარგებლო პასუხთა მოლოდინში.
აქ საქართველო სწავლობს.
ის ხვალინდელი დღისთვის ემზადება - ქვათა შეკრების დროა.
ამ მაგიდებთან რამდენიმე სიცოცხლე, რამდენიმე ბედი, რამდენიმე ცხოვრება ერთად მოიყრის თავს - ერთმანეთს დაეხმარებიან, რომ საქართველოც და მათი მომავალიც უკეთესი გახდეს.
კარგად გაირჯებიან, ეს მომავალი რომ გამოძერწონ.
ზოგი წაუზარმაცებს, სხვა დააგვიანებს, კიდევ სხვა წაიცელქებს კიდეც, მაგრამ ყველა მისთვის რაღაც ღირებულს ისწავლის.
საკლასო ოთახში წყდება, ვინ და რანი ვიქნებით ხვალ“.
