2024-2025 სასწავლო წელი მიიწურა, აკაკი ტერელაძის სახელობის ხონის მუნიციპალიტეტის სოფელ ქუტირის საჯარო სკოლაში წარმატებით მიაღწიეს ეროვნული სასწავლო გეგმით გათვალისწინებულ მიზნებს.
მოსწავლეთა ჰოლისტური განვითარებისთვის, სასწავლო წლის მანძილზე მიმართავდნენ სხვადასხვა სასწავლო მეთოდებსა და სტრატეგიებს. სასწავლო პროცესი გაჯერებული იყო მრავალფეროვანი პროექტებით, ღონისძიებებითა თუ აქტივობებით.
მათ შორის წარმატებით დასრულდა პროექტი - „აფხაზეთი საქართველოა!“. გრძელვადიანი პროექტი სამ ეტაპად წარიმართა და მასზე მე-6 კლასის მოსწავლეებმა საგანში - „ჩვენი საქართველო“, პედაგოგ მაია ფეიქრიშვილის ხელმძღვანელობით იმუშავეს.
პროექტში ჩართული იყვნენ მშობლები, თემის წარმომადგენლები, კლასის დამრიგებელი ნ. შალამბერიძე და სხვები.
პირველი აქტივობის ფარგლებში, მოსწავლეებმა შექმნეს საინფორმაციო ბუკლეტები, პოსტერები მოწოდებით - „აფხაზეთი საქართველოა, ჩვენ დავბრუნდებით!“
მოსწავლეებმა ბროშურები დაარიგეს სკოლაში, თემის ადმინისტრაციაში, სამედიცინო პუნქტში, მოსახლეობაში.
მეორე აქტივობით სკოლის ბიბლიოთეკაში პრეზენტაციებით წარადგინეს აფხაზეთი, როგორც საქართველოს განუყოფელი ნაწილი და მომზადებული პოსტერები გამოფინეს, შემდეგ ნახეს დოკუმენტური ფილმი სოხუმზე, მცირე ისტორიულ-გეოგრაფიული ექსკურსით დამსწრე საზოგადოება აფხაზეთში ამოგზაურეს. იქვე გაჩნდა სურვილი, წასულიყვნენ განმუხურში, ენგურის ხიდიდან ხმა მიეწვდინათ მოძმეთათვის და მცირე პერფორმანსით იქაც ხმამაღლა ეთქვათ - „აფხაზეთი საქართველოა !“. ასეც მოხდა სკოლის დირექტორის - ზურაბ თოდუას დახმარებით მოსწავლეები მასწავლებელთან, მშობლებთან, დამრიგებელთან ერთად გაემგზავრნენ ანაკლიაში. საოცარად ამაღელვებელი სანახაობა იყო ხიდთან - ფრიალებდა საქართველოს დროშები, ისმოდა ლექსი, სიმღერა, შეძახილები - „გამარჯობა, აფხაზეთო შენი“, „ჩვენ დავბრუნდებით!“, „აფხაზეთი საქართველოა!“,
„მიყვარხარ, სოხუმოოო - დავემშვიდობეთ სიამაყით, გულისწყვეტით მშობლიურ კუთხეს უახლოეს მომავალში დაბრუნების სურვილით. მადლობა პროექტის ავტორს მაია ფეიქრიშვილს, მეექვსე კლასის მოსწავლეებსა და მშობლებს, დამრიგებელს ნანა შალამბერიძეს, ნინო გორდულაძეს, დიტო ბუაძეს. უდიდესი მადლობა ყოველთვის მხარდამჭერსა და თანამოაზრეს ბ.ნ ზურაბ თოდუას“,- აღნიშნავენ სკოლაში.
