სახელმწიფო სიმბოლიკა, რომ ოფიციალურად აღიარებული ნიშნები და სიმბოლოებია, რომლებიც გამოხატავენ ქვეყნის იდენტობას, სუვერენიტეტს, ღირებულებებსა და ისტორიულ-კულტურულ მემკვიდრეობას ჭიათურის N2 საჯარო სკოლის მოსწავლეებმა კარგად იციან, ახლა კი საქართველოს სიმბოლიკის განვითარება და ისტორიული მნიშვნელობაც სიღრმისეულად შეისწავლეს.
საქართველოს სიმბოლიკა - ამ თემაზე ჩატარდა ღია გაკვეთილი ჭიათურის N2 საჯარო სკოლის მე-10 კლასში, პედაგოგ ნარგიზა კუტალიას ხელმძღვანელობით.
მოსწავლეებმა ისაუბრეს ქართული დროშის განვითარებასა და მის ისტორიულ მნიშვნელობაზე. ერთმანეთს შეადარეს 1918-21 წლის დემოკრატიული რესპუბლიკის და 2004 წელს მიღებული ქართული დროშები, შეაფასეს ფერებისა და სიმბოლოების კომბინაცია, რომელიც გამოხატავს ქვეყნის ერთიანობას, ისტორიულ ტრადიციებს და იდეოლოგიას, გააანალიზეს დემოკრატიული და დამოუკიდებელი რესპუბლიკების გერბი - რთული სიმბოლური კომპოზიცია, რომელიც შედგება ფერების, ფიგურებისა და ფორმებისაგან. წარმოადგინეს თვიანთი ხელით შექმნილი ორივე პერიოდის დროშა და გერბი.
მოსწავლეებმა ისაუბრეს ჰიმნის მუსიკალურ-პოეტურ კომპოზიციაზე, რომელიც ირჩევა ქვეყნის ეროვნული გრძნობების გამოსახატავად, შეაფასეს სახელმწიფო ჰიმნები - „დიდება“ და „თავისუფლება“. ბოლოს კი აღწერეს და განიხილეს მსოფლიო საერთაშორისო ორგანიზაციების სიმბოლიკები - გაერო, ნატო, ეუთო, ევროსაბჭო.
გაკვეთილზე მოისმინეს დემოკრატიული და დამოუკიდებელი საქართველოს ჰიმნები, გამოყენებული იყო რესურსები - პოსტერები, ისტ-თვალსაჩინოება და სხვა.
გაკვეთილის დროს იგრძნობოდა მოსწავლეთა ღრმა პასუხისმგებლობა და საკითხის საფუძვლიანი ცოდნა. გაკვეთილს ესწრებოდნენ მოსწავლეთა მშობლები. მათ მადლობა გადაუხადეს ბავშვებს და მასწავლებელს საინტერესო გაკვეთილისთვის.
იხილეთ ფოტოები:
