კერძო სკოლა „ანაბასისში“ მეტად საინტერესო სასწავლო პროცესი მიმდინარეობს რაც მოსწავლეთა მრავალმხრივ განვითარებას ემსახურება და მათი ცოდნის ხარისხსა და მოტივაციაზე აისახება.
შემოქმედება, ემოცია და შთამბეჭდავი „შვლის ნუკრის ნაამბობი“ - ასეთია გაკვეთილი, რომელიც მოსწავლეთა გულებში დიდხანს დარჩება.
სკოლა „ანაბასისის“ Vბ კლასში ლიტერატურის გაკვეთილი ვაჟა-ფშაველას „შვლის ნუკრის ნაამბობის“ მიხედვით, განსაკუთრებულ ფორმატში ჩატარდა.
როგორც სკოლაში გვეუბნებიან, გაკვეთილის მიზანი იყო ტექსტის ღრმა გააზრება, ემოციების გაცოცხლება და შემოქმედებითი აზროვნების განვითარება.
მოსწავლეებმა შექმნეს დიორამები ნაწარმოების სხვადასხვა ეპიზოდზე, საკუთარი ხედვისა და ინტერპრეტაციის შესაბამისად. მათ წარმოადგინეს პრეზენტაციები, სადაც გამოჩნდა არა მხოლოდ ლიტერატურული ანალიზის უნარები, არამედ პერსონაჟების განცდების თანაგანცდა, ჰუმანური ღირებულებების გააზრება და ხელოვნებისადმი სიყვარული.
გაკვეთილს განსაკუთრებული ხიბლი შემატა ქართული ენისა და ლიტერატურის პედაგოგის - თამარ სვანიძის სიურპრიზმა - იგი გაკვეთილზე თავის ხელით მოხატული თეთრი პერანგით გამოცხადდა, რომელზეც გამოსახული იყო „შვლის ნუკრის ნაამბობისა“ და სხვა ლიტერატურული ნაწარმოებების პერსონაჟები. ეს ჟესტი მოსწავლეებმა აღტაცებით მიიღეს - ეს არის ნათელი მაგალითი იმისა, თუ როგორ შეუძლია მასწავლებელს სიტყვაზე მეტად მოქმედებით ასწავლოს.
გაკვეთილი გადაიქცა ცოდნის, ემოციის, შემოქმედებისა და ლიტერატურის სიყვარულის ნამდვილ დღესასწაულად. მოსწავლეებმა აღნიშნეს, რომ ეს დღე სამუდამოდ დაამახსოვრდებათ და დიდი სურვილი აქვთ, მომავალშიც ჩაერთონ მსგავს აქტივობებში.
„ეს გაკვეთილი იყო ნამდვილი ზეიმი — სიყვარულის, ხელოვნების, ურთიერთობისა და განათლების!“- აღნიშნავენ სკოლაში.
