ახალქალაქის მუნიციპალიტეტის სოფელ დილისკის N1 საჯარო სკოლის მოსწავლეები საერთაშორისო პროექტში მონაწილეობენ.
eTwinning პროექტის - „მეგობრობა ყველა კარს ხსნის“ დამფუძნებელი გახდავთ დილისკის N1 საჯარო სკოლის ქართული ენის მასწავლებელი იამზე მსხვილიძე, თანადამფუძნებელი კი ვალენტინა თედოროვა ჩრდილოეთ მაკედონიიდან.
2 დეკემბერს, გაიმართა საერთაშორისო ონლაინ შეხვედრა მასწავლებლებისთვის, „ზუმის“ პლატფორმაზე, შეხვედრის მიზანი იყო პროექტის გეგმის, ამოცანებისა და აქტივობების გაცნობა.
პრეზენტაცია წარადგინა პროექტის დამფუძნებელმა - იამზე მსხვილიძემ.
17 თებერვალს კი ჩატარდა საერთაშორისო ონლაინ შეხვედრა მოსწავლეებისა და მასწავლებლებისთვის Zoom-ის პლატფორმაზე.
შეხვედრის მიზანი იყო სხვადასხვა ქვეყნის მოსწავლეთა გაცნობა, კულტურული დიალოგის წახალისება და ახალი მეგობრული კავშირების შექმნა.
პროექტის დამფუძნებელმა, იამზე მსხვილიძემ, მონაწილეებს გააცნო შეხვედრის მიზანი და აქტივობები:
- მოსწავლეთა პრეზენტაციები თემაზე - „გაგვაცანი შენი ქვეყანა, ქალაქი/სოფელი და სკოლა“;
- გუნდური, შემოქმედებითი აქტივობა: „პრინცესა ლილეს გადასარჩენად“;
- ინტერაქტიული თამაში Kahoot!
პროექტის - „მეგობრობა ყველა კარს აღებს“ ზოგადი მიზნებია:
- ხელი შეუწყოს სხვადასხვა ქვეყნის მოსწავლეებს შორის მეგობრული და კეთილმეზობლური ურთიერთობების ჩამოყალიბებას;
- წაახალისოს მოსწავლეებში კულტურათაშორისი დიალოგი და ურთიერთგაგება;
- გააფართოვოს მოსწავლეთა ჰორიზონტი და გააცნოს მათ სხვადასხვა ქვეყნების კულტურა, ტრადიციები და ღირებულებები;
- ხელი შეუწყოს მოსწავლეებში კომუნიკაციის, თანამშრომლობისა და შემოქმედებითი უნარების განვითარებას;
- ხელი შეუწყოს მოსწავლეების მოტივაციასა და ინტერესს უცხო ენების შესწავლის მიმართ.
როგორც პროექტის ხელმძღვანელი გვეუბნება, პროექტი მიმდინარეა და აგრძელებს მრავალფეროვანი და კრეატიული აქტივობებით მიზნის მიღწევას, მიზანი კი რაბათის ისტორიულ ციხე-კოშკში ჩამწყვდეული ლილეს გათავისუფლებაა.
პროექტის აქტივობების ჩამონათვალი ბევრია, მათ შორის აღსანიშნავია:
- მორზეს კოდის გამოწვევა;
- ენების შესწავლა;
- გამოცანების ამოხსნა, ფაზლების აწყობა;
- სიმბოლოების გაშიფრვა და მონაწილე ქვეყნებთან დაკავშირება;
- კულტურული გაცვლა;
- კრეატიული წერა;
- სპექტაკლის/სცენის მომზადება;
- დისკუსიები ისტორიებზე, პოდკასტების მომზადება;
- პოდკასტის შექმნა, პროექტის გავრცელება, შეფასება და ერთობლივი პროდუქტის პრეზენტაცია;
- ყველა პარტნიორი ქვეყნის ამბის გაერთიანება და ელექტრონული წიგნის შექმნა.
პროექტის მონაწილე ქვეყნებია: საქართველო, საბერძნეთი, თურქეთი, ჩრდილოეთ მაკედონია, ბულგარეთი, ხორვატია, რუმინეთი, უკრაინა, პოლონეთი.
იხილეთ ფოტოები:
