ოზურგეთის მუნიციპალიტეტის დაბა ნარუჯის საჯარო სკოლაში წარმატებით მუშაობს ეკოკლუბი, რომლის მოსწავლეებიც გარემოსდაცვით აქტივობებს აქტიურად ახორციელებენ.
ახლახან, კი გაეროს სურსათისა და სოფლის მეურნეობის ორგანიზაციის (FAO) გამოცხადებულ კონკურსს, რომელიც განკუთვნილია „ნიკო კეცხოველის სასკოლო პრემიის“ პროექტში მონაწილე ეკოკლუბებისათვის, დაბა ნარუჯის საჯარო სკოლის ეკოკლუბი - „მწვანე მომავალი“ აქტიურად შეუერთდა.
ეკოკლუბელები გაეცნენ გზამკვლევს, რომელიც თემის - „თევზის მოშენება - სოფლის მეურნეობის ახალი მიმართულება“ შესწავლას ითვალისწინებს.
კონკურსის ფარგლებში ეკოკლუბის წევრებმა მოიძიეს ინფორმაცია რეგიონში, კერძოდ გურიაში თევზის სატბორე მეურნეობის არსებობის შესახებ, რომელიც ოზურგეთის მუნიციპალიტეტის სოფელ ვაკიჯვარში მდებარეობს. ეკოკლუბის წევრები ესტუმრნენ საკალმახე მეურნეობას, ესაუბრნენ ადმინისტრაციის ხელმძღვანელებს და მიიღეს მათგან მეტად საინტერესო და საჭირო ინფორმაცია. მოსწავლეებმა ნახევარი დღე გაატარეს მეურნეობაში დასაქმებულებთან და დააკვირდნენ მათ საქმიანობას, თევზების ქცევას და სამუშაო პროცესშიც ჩაერთვნენ.
მოსწავლეებმა შეიტყვეს, რომ ვაკიჯვრის საკალმახე მეურნეობა 2006 წლიდან ფუნქციონირებს, დღეის მდგომარეობით საკალმახე მეურნეობაში 59 მოქმედი აუზია რომელიც 7 ჰექტარზეა გაშენებული, მეურნეობაში წლიურად 250 ტონა კალმახს და 3 ტონა ხიზილალას აწარმოებენ, დასაქმებულია 40 ადგილობრივი. პროდუქციის რეალიზაცია ხდება როგორც ადგილობრივ ბაზარზე, ასევე იგზავნება დედაქალაქსა და რეგიონებში. აღსანიშნავია, რომ კალმახთან ერთად მეურნეობაში ზუთხის გამრავლებაც დაიწყეს.
ეკოკლუბის წევრებმა მადლობა გადაუხადეს საკალმახე მეურნეობის ხელმძღვანელობას გულთბილი მასპინძლობისათვის საჭირო ინფორმაციის მიღებისათვის.
როგორც სკოლაში აღნიშნავენ, ურთიერთთანამშრომლობა, მომავალშიდაც გაგრძელდება.
იხილეთ ფოტოები:
