ქობულეთის მუნიციპალიტეტის სოფელ ჩაისუბნის N2 საჯარო სკოლაში სასწავლო პროცესი საინტერესო ინიციატივებითა და აქტივობებითაა გაჯერებული, რომლებშიც მოსწავლეები დიდი ინტერესით მონაწილეობენ.
ამჯერად, IXბ კლასის მოსწავლეები სასიქადულო მამულიშვილის კვირეულს შეუერთდნენ და წარმოადგინეს პროექტის პრეზენტაცია, თემაზე: „ილია ჭავჭავაძე - ქართული ენის რეფორმატორი“.
მოსწავლეებმა აუდიტორიას გააცნეს ილიას როლი ქართული ენის განვითარებაში, მის მიერ დამკვიდრებული სიტყვები და არქაულ ძეგლებად ქცეული ხმარებიდან ამოღებული ასოები.
როგორც სკოლაში აფასებენ, მრავალფეროვანი მასალის მოძიება-დამუშავება შრომატევადი და ნაყოფიერი გამოდგა მოსწავლეთა ცნობიერების ამაღლების კუთხით.
აღნიშნული პრეზენტაცია შთამბეჭდავი და საინტერესო იყო მსმენელთათვის და მას ქართული ენისა და ლიტერატურის მასწავლებელი აზა თავართქილაძე ხელმძღვანელობდა.
იხილეთ ფოტოები:
