დედამიწა რომ ჩვენი საერთო სახლია და მას დაცვა და მოფრთხილება სჭირდება ალექსანდრე ლილუაშვილის სახელობის ვანის მუნიციპალიტეტის სოფელ შუაგორას საჯარო სკოლის მოსწავლეებმა კარგად იციან, რადგან მათი ეკოცნობიერების ამაღლებაზე პედაგოგები აქტიურად ზრუნავენ.
22 აპრილს, დედამიწის დღესთან დაკავშირებით, შუაგორას საჯარო სკოლაში გაიმართა საინტერესო ღონისძიება, ერთგვარი სადღესასწაულო მილოცვა „დედამიწისადმი“.
ღონისძიება მე-3 კლასის მოსწავლეებმა, კლასის დამრიგებლის - გ. ბაჯაძის ხელმძღვანელობით გამართეს. ზეიმი მუსიკალურად გააფორმა მუსიკის მასწავლებელმა ნ.ბაღდავაძემ.
ღონისძიების ორგანიზატორმა და მოსწავლეებმა ზეიმზე მიიწვიეს ზეინდრის დაწყებითი კლასის პედაგოგები და მოსწავლეები.
ღონისძიება საინტერესოდ, მოსწავლეთა აქტიური ჩართულობით წარიმართა.
„ეს დღე გამორჩეულია რადგან დედამიწა ყველას სახლია. ამ სახლს მოფერება, მოვლა და პატრონობა სჭირდება. ბავშვებმა ბევრი პრობლემა წამოწიეს წინა პლანზე, თუნდაც დაბინძურებული გარემო, გაჩეხილი ტყეები, ხანძარი რომელიც ადამიანმა გამოიწვია, გადაშენების პირას მყოფი ცხოველები და ფრინველები“,- გვეუბნებიან სკოლაში, ღონისძიების მნიშვნელობას უსვამენ ხაზს და დასძენენ, რომ ღონისძიებამ სასიამოვნო გარემოში ჩაიარა.
იხილეთ ფოტო-ვიდეომასალა:
