ადიგენის მუნიციპალიტეტის სოფელ ხევაშენისა და ბენარის საჯარო სკოლებში სასწავლო წელი აქტიურად მიმდინარეობს.
2024 წლის პირველ მაისს, ბენარის საჯარო სკოლაში ხევაშენისა და ბენარის საჯარო სკოლებს შორის გაფორმებული თანამშრომლობითი მემორანდუმის საფუძველზე, ორივე სკოლის ქართული ენისა და ლიტერატურის კათედრების ორგანიზებით, ერთობლივი ღონისძიება - „ჩვენ ვკითხულობთ ევროპულ ლიტერატურას“ ჩატარდა.
პრეზენტაციასთან ერთად, მოსწავლეები მწერლების გამონათქვამებს, ლექსებსა და პროზიდან ნაწყვეტებს კითხულობდნენ. ისინი თავიანთი საყვარელი ავტორების შესახებ საუბრობდნენ, აანალიზებდნენ საინტერესო ნაწარმოებებს და ქართველ მწერლებთან პარალელს ავლებდნენ.
აღნიშნული ღონისძიების მიზანი მოსწავლეებში წიგნიერების დონის ამაღლება, შემოქმედებითი, თანამშრომლობითი, კრიტიკული სააზროვნო უნარების განვითარება იყო.
ღონისძიების დასასრულს, ხევაშენისა და ბენარის სკოლების ხელმძღვანელებმა - მარიტა შველიძემ და ნინო ფორჩხიძემ ღონისძიების მონაწილეებს, საინტერესო აქტივობების მომზადებებისთვის მადლობა გადაუხადეს და თანამშრომლობის სამომავლო გეგმებზე ისაუბრეს.
