ხელვაჩაურის მუნიციპალიტეტის სოფელ ქვემო მახოს საჯარო სკოლაში სასწავლო წლის განმავლობაში არაერთი საინტერესო აქტივობა და ღონისძიება იმართება, რომელშიც მოსწავლეები დიდი ენთუზიაზმით ერთვებიან.
მათ შორის იყო, სკოლაში, V და VI კლასების მოსწავლეთა მონაწილეობით ჩატარებული ღონისძიება - „ილია- ერის მამა“.
აღნიშნულ დღეს, მოსწავლეებმა გაიხსენეს ბუმბერაზი მწერლისა და პოეტის, სამშობლოზე უსაზღვროდ შეყვარებული საზოგადო მოღვაწის ილია ჭავჭავაძის შემოქმედება და მოღვაწეობა.
მოსწავლეებმა, სკოლაში, წარადგინეს ილია ჭავჭავაძის შესანიშნავი ოთხი ნაწარმოებიდან პატარ-პატარა თეატრალური დადგმები. ესენია:
- „ოთარაანთ ქვრივი“;
- „მგზავრის წერილები“;
- „კაცია- ადამიანი?!“;
- „განდეგილი“.
„მათ ასევე გაიხსენეს მისი ლექსები, ბრძნული გამონათქვამები და განსაკუთრებით ხაზი გაუსვეს იმ მთავარ პრინციპებს, რომელთათვისაც ილია მთელი ცხოვრების განმავლობაში შეუდრეკელად იბრძოდა და იცავდა“ , - აღნიშნავენ სკოლაში.
ღონისძიების დღეს, კლასი მოირთო მოსწავლეების შესრულებული ნახატებით და წარწერებით, სადაც წარმოჩენილი იყო ბავშვების შემოქმედებითი უნარები.
მსგავსი აქტივობები და ღონისძიებები მოსწავლეთა მრავალმხრივ განვითარებას, მოტივაციის ამაღლებას ხელს უწყობს.
იხილეთ ფოტო-ვიდეომასალა:
