საქართველოს საპატრიარქოს წმიდა თამარ მეფის სახელობის გიმნაზიისა და ხელოვნების სკოლა-პანსიონის ადმინისტრაციამ, მოსწავლეებმა და პედაგოგებმა საქართველოს სახელმწიფოებრივი დამოუკიდებლობის აღდგენის დღე აღნიშნეს.
პატრიოტული სულისკვეთებით განმსჭვალული კონცერტი - რუსთაველის გამზირზე, პირველი კლასიკური გიმნაზიის წინ, ილია ჭავჭავაძისა და აკაკი წერეთლის ძეგლთან გაიმართა.
საერთაშორისო ფესტივალების ლაურეატმა, ხელოვნების სკოლა-პანსიონის მოსწავლეთა ქორეოგრაფიულმა ანსამბლმა - „არსიანმა“ (ხელმძღვანელი ჯონი დუგლაძე) ქართული ხალხური ცეკვები შეასრულა;
ხოლო მუსიკალურ ფესტივალ „მომავლის ვარსკვლავების“ მრავალგზის ლაურეატმა და „გრან-პრის“ მფლობელმა ვაჟთა ფოლკლორულმა ანსამბლმა (ხელმძღვანელი ტარიელ ხუციშვილი) ქართული ხალხური სიმღერები შეასრულა.
გიმნაზიის მოსწავლეებმა კი ქართველ პოეტთა საქართველოს დამოუკიდებლობისადმი მიძღვნილი ლექსები წაიკითხეს;
ქართველთა პოეტმა თინათინ მღვდლიაშვილმა საკუთარი ლექსები: „აღმაშენებელი თბილისს მობრძანდება“, „ოცდაათი ვერცხლი“ და „ხმალი ავლესოთ ქართველებო“ წაიკითხა.....
დამოუკიდებლობის 30 წლისადმი მიძღვნილ ღონისძიებას საქართველოს უზენაესი საბჭოს დეპუტატები და ეროვნულ-განმათავისუფლებელი მოძრაობის წარმომადგენლები ესწრებოდნენ.
მოსწავლეებს მიესალმა უზენაესი საბჭოს წევრი, საქართველოს დამოუკიდებლობის აქტზე ხელმომწერი, ბატონი მირიან წიკლაური, რომელმაც საზოგადოებას საქართველოს დამოუკიდებლობის დღე მიულოცა და ის ბედნიერი დღეები გაიხსენა.
აღსანიშნავია, რომ 9 აპრილი - ეს არის ერთი დღე, ორი დიდი ისტორიული მნიშვნელობით. ეს დღე ისტორიაში ჩაეწერა ტრაგედიის და ამავდროულად, საქართველოს დამოუკიდებლობის აღდგენის დღედ.
იხილეთ ფოტოები:
