ვაზიანის N2 საჯარო სკოლაში ისტორიის მასწავლებლის ქეთევან ინდუაშვილის ხელმძღვანელობით, გაიმართა 9 აპრილისადმი მიძღვნილი ღონისძიება - „35 წელი 9 აპრილის ტრაგედიიდან“.
ღონისძიებაში მე-6ბ და მე-8ბ კლასის მოსწავლეები მონაწილეობდნენ.
მოსწავლეებმა წარმოადგინეს 9 აპრილისადმი მიძღვნილი პროექტები, ისაუბრეს 1989 წლის 9 აპრილის ტრაგედიაზე, ტრაგედიის წინაპირობებზე და შემდგომ განვითარებულ მოვლენებზე. აღნიშნეს, რომ 1989 წლის 9 აპრილის ტრაგედიამ უმნიშვნელოვანესი როლი შეასრულა საქართველოს უახლეს ისტორიაში. ასევე დასძინეს, რომ არასოდეს დაივიწყებს ქართველი ერი 9 აპრილს დაღუპულ ადამიანებს და წუთიერი დუმილით პატივი მიაგეს მათ ხსოვნას.
„მათ ხსოვნას ქვეყანა სანთლებად აინთებს“ - გააჟღერეს მოსწავლეებმა და ღონისძიება დაასრულეს ლელა ვეფხვაძის შესრულებული სიმღერით „სალაღობო“.
აღსანიშნავია, რომ ღონისძიების მიზანი დაღუპულთა სახელების უკვდავყოფა და იმის არდავიწყება იყო, რაც 9 აპრილს რუსთაველის გამზირზე მოხდა.
იხილეთ ფოტოები:
