სკოლის ნიშნებით უმაღლესში ჩარიცხვის საფრთხეებზე აბიტურიენტები საუბრობენ - „მასწავლებლები ხშირად სუბიექტურები არიან...“
05-02-2025

უნდა ჰქონდეს თუ არა სკოლის ნიშნებს გავლენა უმაღლესში ჩარიცხვაზე ? - ამ კითხვით აბიტურიენტებს მას შემდეგ მივმართეთ, რაც საზოგადოებას მთავრობის 4 წლიანი სამოქმედო გეგმაში არსებული ინიციატივის შესახებ მივაწოდეთ ინფორმაცია.

სკოლის ნიშნებს გავლენა ექნება უმაღლესში ჩარიცხვაზე

საკითხთან დაკავშირებით საზოგადოების აზრი ორად გაიყო. ნაწილს მიაჩნია, რომ ეს უსამართლობა იქნება, რადგან შესაძლოა სკოლებში კორუფცია დაბრუნდეს, ნაწილი კი ფიქრობს რომ ეს გაზრდის მასწავლებლის გავლენას და სწავლაც უფრო ხარისხიანი გახდება. იქიდან გამომდინარე რომ ეს საკითხი განსაკუთრებით სენსიტიური აბიტურიენტებისთვისაა, მიუხედავად იმისა რომ ცვლილება წლევანდელ დამამთავრებელი კლასის მოსწავლეებს არ შეეხებათ, გადავწყვიტეთ აზრი სწორედ მათთვის გვეკითხა. 

„ჩემი აზრით, მასწავლებლის შეფასებაზე არ უნდა იყოს დამოკიდებული მოსწავლეების უნივერსიტეტში ჩარიცხვა-არ ჩარიცხვა. სამწუხაროდ, ზოგჯერ მასწავლებლები სამართლიანები არ არიან. მათ ბავშვების გამორჩევა იციან, ამოჩემება... ერთს სულ მაღალ ქულებს უწერენ, მეორეს დაბალს. შეიძლება პედაგოგს მოსწავლე პიროვნულად არ მოსწონდეს და ქულას არ უწერდეს. ამან არ უნდა განსაზღვროს მოსწავლის მომავალი“, - ამბობს მე-12 კლასის მოსწავლე ანა.

„ეროვნულ გამოცდებზე შეიძლება დავიბნეთ და ჩვენი შესაძლებლობების მაქსიმუმი ვერ წარმოვაჩინოთ, ამიტომ, ვფიქრობ, კარგი იქნება თუ ქულები განსაზღვრავს უნივერსიტეტში ჩარიცხვას. იმ შემთხვევაში თუ რომელიმე მასწავლებელი „გადაგვეკიდება“ და ქულას არ დაგვიწერს დირექტორმა უნდა დანიშნოს ამ საგანში გამოცდა და ცოდნის წარმოჩენის შესაძლებლობა მოგვცეს“, - ამბობს აბიტურიენტი ნიკა.

„არასწორი გადაწყვეტილებაა, სკოლაში ხშირად ვერ ვამჟღავნებთ ჩვენი შესაძლებლობების მაქსიმუმს, ან ვამჟღავნებთ, მაგრამ ეს ქულებზე შესაბამისად არ აისახება. მე მყავს რამდენიმე მასწავლებელი, რომლის დაწერილ ქულებს არ მივესალმები და მგონია, რომ მეტი მეკუთვნის, თუმცა თუ ეს გახდება უნივერსიტეტში ჩარიცხვის ერთ-ერთი მნიშვნელოვანი კომპონენტი, უსამართლობა იქნება. დარწმუნებული ვარ, რომ გამოცდაზე გაცილებით მაღალ ქულას მივიღებ“, - აღნიშნავს დამამთავრებელი კლასის მოსწავლე ნია.

„პირველ რიგში, იმით დავიწყებ, რომ გამოცდების გამო ძალიან ვღელავ. ყველა საგანში ვემზადები, ფაქტობრივად, მეორე წელია, წესით, სანერვიულო არ მაქვს, მაგრამ თავს მაინც ვერ ვერევი. რაც შეეხება მისაღებ გამოცდებზე სკოლის ნიშნის საკითხს. მე პირადად, მართებული არ მგონია. მე სკოლაში ძალიან კარგად ვსწავლობ, უმაღლესი ნიშნებიც მყავს, თუმცა მაგალითად, ჩემი კლასელების ნაწილი იმ საგნებს, რომლებიც არ აინტერესებთ, ნაკლებ ყურადღებას აქცევენ. არიან ისეთებიც, ვისთვისაც ნიშანი არაფერია და ზოგადი ცოდნა ნამდვილად აქვთ. ამ შემთხვევაში, მგონი მათი პოტენციალი ჩაიკარგება, რადგან მსგავსი მოსწავლეები ახლაც არსებობენ და მომავალშიც იქნებიან“, - ამბობს მეთორმეტე კლასელი თეკლა.

„ზოგიერთი მასწავლებელი ნიშანს ისე არ წერს თუ მასთან არ ემზადები, ამიტომ უსამართლობაა ეს გადაწყვეტილება. ასე ყველა ადგება და დაიწყებს თავის პედაგოგთან მომზადებას, მეორეხარისხოვანი იქნება ცოდნის მიღება. არადა, ქულები საერთოდ არ განსაზღვრავს მოსწავლის ინტელექტს და ნამდვილ ცოდნას. ამიტომ, ნამდვილად არ მივესალმები ამ გადაწყვეტილებას“, - აღნიშნავს აბიტურიენტი საბა.

 
სკოლების სიახლეები
დაგვიკავშირდით
557 54 00 60
მოგვწერეთ
etaloniganatleba@etaloni.ge
მისამართი
0119, თბილისი, წერეთლის გამზ. #116 „დიდუბე პლაზა“ ოფისი 203